اەس سالۋ جوباسى حالىقتىڭ پىكىرىن ەسكەرە وتىرىپ قانا قابىلدانۋى مۇمكىن.
ق ر ەنەرگەتيكا ءمينيسترى بولات اقشولاقوۆ ورتالىق كوممۋنيكاسيالار قىزمەتىندە وتكەن بريفينگتە اتوم ەلەكتر ستاناسىن سالۋ جوباسى تۋرالى پىكىر ءبىلدىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«جۋىقتا رەسەيلىك «روساتوم» مەملەكەتتىك كورپوراسياسىنىڭ باس ديرەكتورى الەكسەي ليحاچيەۆ قاڭتار وقيعالارى ءوز كومپانياسىنىڭ قازاقستانمەن اتوم ەلەكتر ستانساسىن سالۋ جونىندەگى ارىپتەستىگىنە اسەر ەتپەيتىنىن مالىمدەدى. بۇل جوبا ءقازىر قانداي ساتىدا ەكەنىن، اەس قۇرىلىسى بويىنشا سوڭعى كەلىسىمدەر تۋرالى ايتىڭىزشى»، - دەپ سۇرادى ب ا ق وكىلى ەنەرگەتيكا مينيسترىنەن.
«شىن مانىندە بۇل وقيعالاردىڭ اراسىندا ەشقانداي بايلانىستىڭ بولۋى دا مۇمكىن ەمەس. ەكەۋى ەكى ءتۇرلى ماسەلە نەگىزى. اتوم ستانساسىن سالۋ - وتە نازىك ماسەلە. سوندىقتان «سالامىز با الدە سالمايمىز با» دەگەن سۇراق بويىنشا ازىرگە ەشقانداي شەشىم جوق»، - دەپ ءتۇسىندىردى بولات اقشولاقوۆ.
سونداي-اق، ول اەس سالۋ جوباسى حالىقتىڭ پىكىرىن ەسكەرە وتىرىپ قانا قابىلدانۋى مۇمكىن ەكەنىن باسا ايتتى. «بۇل دا قاراستىرىلۋى مۇمكىن. ءبىراق تاعى دا ايتايىن، بۇل وتە نازىك ماسەلە جانە تىڭعىلىقتى زەردەلەۋدى قاجەت ەتەدى. ول زەرتتەۋگە ءبىرىنشى كەزەكتە قوعامدى تارتۋ كەرەك. ازىرگە قازاقستاننىڭ قانداي دا ءبىر ۋچاسكەسىندە ستانسيا سالۋ جونىندە ايقىن شەشىم جوق»، - دەدى مينيستر.