وقۋ-اعارتۋ مينيسترلىگىنىڭ باسپا ءسوز قىزمەتى «100 جاڭا ەسىم – 100 نوۆىح ليس» تاقىرىبىن جالعاستىرۋدا.
بۇل جولى مينيسترلىك جەتىسۋ وبلىسى الاكول اۋدانى دوستىق اۋىلىنىڭ ورىس ءتىلى مەن ادەبيەتى ءپانىنىڭ ءمۇعالىمى بوتاگوز وماروۆانى تانىستىرماق، دەپ حابارلايدى aqshamnews.kz.
ۇستاز 50 ۇزدىك كرەاتورلاردىڭ قاتارىندا TikTok-تىڭ بەدەلدى Discover List-2025 تىزىمىنە ەندى. Discover List — بۇل كورەرمەندى شابىتتاندىرىپ، ءتۇرلى ترەند جاساپ جۇرگەن، الەمنىڭ ءار تۇكپىرىندەگى ءتۇرلى مازمۇنداعى كونتەنت اۆتورلارىنا ارنالعان TikTok جوباسى. بوتاگوز وماروۆا وسى تىزىمدەگى «وقىتۋشىلار» ساناتى بويىنشا ەرەكشەلەنىپ، ءبىلىم بەرۋ مازمۇنىن دامىتۋعا قوسقان ۇلەسى ءۇشىن باعالاندى.
20 جىلدان استام ەڭبەك تاجىريبەسى بار ۇستاز 3 جىل بۇرىن TikTok الەۋمەتتىك جەلىسىندە جەكە پاراقشاسىن جۇرگىزە باستاعان. وسىلايشا، ساباق بەرۋ پروسەسىندەگى ادىستەمەلەرى مەن وقىتۋعا ستاندارتتى ەمەس كوزقاراسى اۋديتوريانىڭ نازارىن اۋدارعان. قىسقا بەينەروليكتەردە بوتاگوز ءتىل مەن ادەبيەتتى كرەاتيۆتى ءتاسىل ارقىلى ۇيرەنۋدى ۇسىنادى. جەلى پايدالانۋشىلارى پەداگوگتەن تەك ساباقتاعى ەرەجەلەردى ۇيرەنىپ قانا قويماي، سونىمەن قاتار مادەنيەتتى، تازا سويلەۋگە جانە ءتىلدىڭ ەرەكشەلىكتەرىن وڭاي تۇسىنۋگە بولاتىنىن جازعان.
«مەن ءتىلدى ۇيرەنۋ — ەرەجەلەردى ەستە ساقتاۋ ەمەس، قىزىقتى پروسەسس ەكەنىن كورسەتكىم كەلدى»، — دەيدى پەداگوگتىڭ ءوزى.
قازاقستاندا TikTok پلاتفورماسى تانىمال جانە ونى ءبىلىم بەرۋ سالاسىنىڭ ماماندارى بەلسەندى پايدالانادى. ماسەلەن، وقىتۋشىلاردى قولدايتىن ءبىرقاتار جوبالار، سونىڭ ىشىندە #ۇستازدار حەشتەگىمەن بايقاۋلار دا وتكىزىلىپ كەلەدى. مۇنداي جوباعا 2023 جىلى بوتاگوز وماروۆا دا قاتىسىپ، جەڭىمپاز اتانعان. بۇل بايقاۋ ۇستازداردى پاندىك ءبىلىم الۋدىڭ تارتىمدىلىعىن ارتتىرۋ ءۇشىن كونتەنتتى قىزىقتى ەتىپ ۇسىنۋعا، ءتۇرلى تاجىريبەلەر جاساۋعا شابىتتاندىرادى.
بۇگىنگى تاڭدا بوتاگوز وماروۆانىڭ TikTok-تاعى جەكە پاراقشاسىندا 160 مىڭنان استام جازىلۋشى بار جانە ول ودان دا كوپ اۋديتوريانى تارتا وتىرىپ، تىكەلەي ەفيردە تەگىن ساباقتار وتكىزىپ كەلەدى. ونىڭ تانىمالدىعى — كوپجىلدىق ەڭبەكتىڭ، ءوز كاسىبىنە دەگەن ادالدىقتىڭ جانە ءبىلىم بەرۋدى بارلىعىنا قولجەتىمدى جانە قىزىقتى ەتۋگە دەگەن ۇمتىلىستىڭ ناتيجەسى.