جەتىسۋ وبلىستىق پوليسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسى، پروكۋراتۋرا وكىلدەرىمەن بىرلەسىپ، "قاراسورا" جەدەل-پروفيلاكتيكالىق ءىس-شاراسى بارىسىندا ەسىرتكى تاسىمالداۋدىڭ ءىرى ارناسىن توقتاتتى.
تەرگەۋ كەزىندە الماتى قالاسىنان جەتىسۋ وبلىسىنا ەسىرتكى جەتكىزىپ، ساقتاۋمەن اينالىسقان ازاماتتىڭ ارەكەتى اشكەرەلەندى. جەدەل-ىزدەستىرۋ ءىس-شارالارى ناتيجەسىندە الماتى وبلىسىنىڭ شامالعان اۋىلىندا 51 جاستاعى ەر ادام ۇستالدى، - دەپ حابارلايدى Aqshamnews.kz.
كەيىننەن كۇدىكتىنىڭ تۇرعىلىقتى جەرىندە جانە جامبىل وبلىسى مەركى اۋدانىنداعى مال شارۋاشىلىعى قويماسىندا ءتىنتۋ جۇرگىزىلىپ، ەرەكشە ءيىسى بار، قاراسوراعا ۇقساس وسىمدىك تەكتەس زات تابىلدى. ساراپتاما قورىتىندىسىنا سايكەس، بۇل كەپتىرىلگەن ماريحۋانا بولىپ شىقتى. ونىڭ جالپى سالماعى 10 كەلىدەن استى.
قۇقىق قورعاۋشىلاردىڭ ايتۋىنشا، مۇنشاما كولەمدەگى ەسىرتكى 10 مىڭنان استام ادامدى تىيىم سالىنعان زاتتاردى تۇتىنۋعا يتەرمەلەۋى مۇمكىن ەدى. الايدا پوليسيانىڭ جەدەل ءارى ۇيلەسىمدى جۇمىسىنىڭ ارقاسىندا ءقاۋىپتى ءونىمنىڭ زاڭسىز اينالىمعا تۇسۋىنە جول بەرىلمەدى.
قازىرگى ۋاقىتتا كۇدىكتى قاماۋعا الىنىپ، تەرگەۋ امالدارى جۇرگىزىلۋدە.
ەسكە سالا كەتەيىك، قولدانىستاعى زاڭناماعا سايكەس، ەسىرتكى قۇرالدارىن، پسيحوتروپتىق زاتتاردى نەمەسە ولاردىڭ انالوگتارىن زاڭسىز ساتىپ الۋ، ساقتاۋ، تاسىمالداۋ، وتكىزۋ نەمەسە جونەلتۋ اۋىر قىلمىس سانالادى. ول ءۇشىن مۇلىكتى تاركىلەي وتىرىپ، جەتى جىلدان ون ەكى جىلعا دەيىن باس بوستاندىعىنان ايىرۋ جازاسى قاراستىرىلعان.