سايلاۋ ناۋقانى الماتى وبلىسىنىڭ 71 وكرۋگىندە وتەدى.

25 شىلدەدە اۋىلدىق وكرۋگتەر اكىمدەرىن سايلاۋ وتەدى.قازىرگى كەزدە 20 ۇمىتكەر ءوز كانديداتۋراسىن ۇسىنىپ ۇلگەردى، دەپ حابارلايدى Almaty-akshamy.kz.

«قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسى كونستيتۋسيالىق زاڭىنىڭ 113-3-بابىنا سايكەس، 2021 جىلعى 25 شىلدەدە اۋىلدىق وكرۋگتەر اكىمدەرىنىڭ سايلاۋى وتەدى. سايلاۋ ناۋقانى الماتى وبلىسىنىڭ 71 وكرۋگىندە وتەدى. اقسۋ اۋدانى بويىنشا 9 اكىم، الاكول – 8، بالقاش -6، ەڭبەكشىقازاق – 10، ەسكەلدى – 1، جامبىل – 2، ىلە – 1، قاراساي – 1، قاراتال – 2، كەگەن – 5، كەربۇلاق – 4، كوكسۋ - 4، پانفيلوۆ - 4، سارقان - 3، تالعار - 4، ۇيعىر - 6، تەكەلى قالاسى -1 سايلاناتىن بولادى. رايىمبەك اۋدانىندا، تالدىقورعان جانە تەكەلى قالالارىندا بوس وكرۋگتەردىڭ بولماۋىنا بايلانىستى اۋىلدىق وكرۋگتەر اكىمدەرىن سايلاۋ وتكىزىلمەيدى»، –دەپ حابارلايدى الماتى وبلىسى اكىمىنىڭ باسپا ءسوز قىزمەتى.

2021 جىلعى 25 ماۋسىمدا وبلىستىڭ اۋماقتىق سايلاۋ كوميسسيالارى 25 شىلدەگە 71 اۋىلدىق وكرۋگتە سايلاۋ تاعايىندادى. سايلاۋ وكرۋگتەرىن تاعايىنداۋ، قۇرۋ تۋرالى اقپارات، سايلاۋدى ازىرلەۋ مەن وتكىزۋ جونىندەگى نەگىزگى ءىس-شارالاردىڭ كۇنتىزبەلىك جوسپارى اۋداندار مەن قالالار اكىمدىكتەرىنىڭ سايتتارىندا ورنالاستىرىلعان جانە جەرگىلىكتى باق-تا جاريالاناتىن بولادى.

بارلىعى سايلاۋدا 17 اۋماقتىق جانە 198 ۋچاسكەلىك سايلاۋ كوميسسيالارى، 1451 سايلاۋ كوميسسيالارىنىڭ مۇشەلەرى جۇمىس ىستەيدى. سايلاۋشىلار سانى 222 مىڭنان استام ادامدى قۇرايدى.

26 ماۋسىمنان باستاپ اكىمدىككە كانديداتتار ۇسىنۋ باستالدى، ۇسىنۋ قۇقىعى ساياسي پارتيالارعا، ازاماتتارعا، ءوزىن-وزى ۇسىنۋ جولىمەن، سونداي-اق ۇسىنۋ مەرزىمى اياقتالعان كۇنى ەكىدەن كەم كانديدات ۇسىنىلعان جاعدايدا، اۋداندار مەن قالالار اكىمدەرىنە تيەسىلى.