«باستاۋ بيزنەس» جوباسى ءوز تيىمدىلىگىن كورسەتتى.
الماتى وبلىسى قاپشاعاي قالاسىندا جەكە بيزنەسىن اشۋعا نيەتتەنگەن ازاماتتار «ەڭبەك» باعدارلاماسىنىڭ مۇمكىندىكتەرىن كەڭىنەن پايدالانۋدا. وسىنداي تالاپتى ازاماتتىڭ ءبىرى كامشات جانداۋلەتوۆا مەملەكەت قولداۋىمەن شاعىن تىگىن اتەلەسىن اشتى. ال كوپ بالالى انا ايدا نۇرسەيىتوۆا ءسان سالونىن قۇرىپ، جۇمىس ىستەۋدە، دەپ حابارلايدى Almaty-akshamy.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
قاپشاعاي قالالىق اكىمدىگىنىڭ حابارلاۋىنشا، ازاماتتاردى كاسىپكەرلىك نەگىزدەرىنە وقىتىپ، ولارعا مەملەكەتتىك گرانت بەرۋدە ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» باعدارلاماسىنىڭ «باستاۋ بيزنەس» جوباسى ءوز تيىمدىلىگىن كورسەتتى.
ماسەلەن، سۋرەتشى-مودەلەر ماماندىعىن العان كامشات جانداۋلەتوۆا بىرنەشە جىل قاپشاعايداعى ءتۇرلى اتەلەلەردە جۇمىس ىستەپ، تاجىريبە جيناعان، كەيىن «باستاۋ بيزنەس» ارقىلى كاسىپكەرلىكتى قولعا الۋعا نيەتتەندى. ارنايى كۋرستان وتكەن سوڭ ءوز بيزنەس جوباسىن قورعاپ شىقتى. 583 400 تەڭگە كولەمىندەگى مەملەكەتتىك گرانتقا يە بولىپ، بۇل سوماعا وندىرىستىك تىگىن ماشيناسىن، تورلاپ تىگۋ مەن ۇتىكتەۋگە ارنالعان تەحنيكالار ساتىپ العان. ءسويتىپ ءقازىر «كامشات» تىگىن ستۋدياسىن اشىپ، جەكە بيزنەسىن جۇرگىزىپ وتىر.
كامشات جانداۋلەتوۆا كاسىبي شەبەرلىگىنىڭ ارقاسىندا 2012 جىلى ءسان ونەرىندە تالابى بار جاس ديزاينەرلەر اراسىندا وتكەن «جاس مامان» بايقاۋىندا جۇلدەلى ورىن العان بولاتىن. كاسىپكەر الداعى جوسپارلارىمەن دە ءبولىستى:
«الداعى ناۋرىز ايىندا 2-5 ملن تەڭگەنىڭ گرانتىنا قاتىسسام دەيمىن. قىز-كەلىنشەكتەردى تىگىن ىسىنە ۇيرەتەتىن ستۋديا جانە تىگىن سەحىن اشۋ جوسپارىمدا بار»، - دەيدى كامشات جانداۋلەتوۆا.
ال كوپ بالالى انا ايدا نۇرسەيىتوۆا قاپشاعاي قالالىق جۇمىسپەن قامتۋ ورتالىعى ارقىلى قىسقا مەرزىمدىك كۋرستا وقىپ، شاشتاراز كاسىبىن مەڭگەرگەن. كەيىن مەملەكەتتىك گرانت يەلەنىپ، وعان شاشتارازدىققا قاجەتتى جابدىقتارىن الدى. ءقازىر «ارداق» شاعىن سۇلۋلىق سالونىن اشىپ، كەلۋشىلەرگە قىزمەت كورسەتۋدە.
قاپشاعاي قالاسى اكىمدىگىنىڭ مالىمەتىنشە، قاپشاعايدا 2021 جىلى شاعىن بيزنەستى دامىتۋعا 200 ايلىق ەسەپتىك كورسەتكىش كولەمىندە 38 ملن تەڭگە شاماسىندا مەملەكەتتىك گرانت بەرىلدى. گرانت نەگىزىنەن از قامتىلعان جانە كوپ بالالى وتباسىلارعا، 29 جاسقا دەيىنگى جاستارعا، مۇمكىندىگى شەكتەۋلى جاندارعا، جۇمىسسىزدار مەن ءوزىن-وزى جۇمىسپەن قامتىعان ازاماتتارعا بەرىلدى.