قازاقستان ۇكىمەتى جەكە قوسالقى شارۋاشىلىقتاردى دامىتۋدى كوزدەپ وتىر

وسى ماقساتتا ارنايى زاڭ ازىرلەگەن.

قازاقستان ۇكىمەتى اۋىل شاۋراشىلىعىن دامىتۋ ءۇشىن جەكە قوسالقى شارۋاشىلىقتارعا جاعداي جاسالۋ كەرەكتىگىن ايتادى. وسى ماقساتتا ازىرلەگەن زاڭ جوباسى پارلامەنتكە جىبەرىلدى، دەپ حابارلايدى Almaty-akshamy.kz.

«مەملەكەت باسشىسىنىڭ تاپسىرماسى اياسىندا اۋىل شارۋاشىلىعى مينيسترلىگى ازىرلەگەن «جەكە قوسالقى شارۋاشىلىق تۋرالى» زاڭ جوباسى جان-جاقتى قوعامدىق تالقىلاۋدان كەيىن قازاقستان رەسپۋبليكاسى پارلامەنتى ءماجىلىسىنىڭ قاراۋىنا جىبەرىلدى، - دەلىنگەن اشم باسپا ءسوز قىزمەتىنىڭ حابارلاماسىندا.

مامانداردىڭ ايتۋىنشا، زاڭ جوباسىنىڭ كەيبىر ساتتەرى مەن نورمالارى قوعام اراسىندا كوپتەگەن سۇراقتار تۋعىزدى، ءبىراق جەكە قوسالقى شارۋاشىلىقتار قىزمەتىنىڭ زاڭنامالىق نەگىزدەرىنىڭ قاجەتتىلىگى ايقىن كورىندى.

رەسمي دەرەك بويىنشا، قازاقستاندا شامامەن 1،6 ملن جقش بار، ولار 2020 جىلدىڭ قورىتىندىسى بويىنشا 2،6 ترلن تەڭگە اۋىل شارۋاشىلىعى ءونىمىن ءوندىردى نەمەسە 41،5%. بۇل رەتتە قىزمەتتىڭ بۇل ءتۇرى جەكە زاڭنامالىق اكتىمەن رەتتەلمەگەن، ولاردىڭ مارتەبەسى انىقتالماعان.  

زاڭ جوباسى مۇددەلى ورگاندارمەن بىرگە قارالىپ، سونداي-اق ۇكىمەتتىك ەمەس ۇيىمدارمەن، فەرمەرلەرمەن، بيزنەس قوعامداستىقپەن، بەلسەندى ازاماتتارمەن جانە تىكەلەي اۋىلدىق ەلدى مەكەندەردىڭ تۇرعىندارىمەن جاريا تالقىلاۋدىڭ بارلىق كەزەڭدەرىنەن ءوتتى. ناتيجەسىندە 1600-دەن استام ۇسىنىستار مەن ەسكەرتۋلەر كەلىپ ءتۇستى.

اتالعان جۇمىستىڭ قورىتىندىسى بويىنشا زاڭ جوباسى كەلىپ تۇسكەن پىكىرلەر مەن ۇسىنىستاردى ەسكەرە وتىرىپ، بىرنەشە رەت پىسىقتالدى.

«زاڭنىڭ قورىتىندى جوباسى ايتارلىقتاي ناقتىلانىپ، جەكە قوسالقى شارۋاشىلىققا ناقتى تۇسىنىك بەرىلدى جانە ونىڭ مارتەبەسى كاسىپكەرلىك ەمەس قىزمەت ءتۇرى رەتىندە انىقتالدى. جەرگىلىكتى اتقارۋشى ورگاندارعا جەكە قوسالقى شارۋاشىلىقتاردى دامىتۋ ءۇشىن جاعداي جاساۋ بولىگىندە ناقتى قوسىمشا وكىلەتتىكتەر بەرىلگەن، ەڭ الدىمەن بۇل جايىلىمدىق جانە شابىندىق القاپتارمەن قامتاماسىز ەتۋ ماسەلەلەرىنە قاتىستى. جەكە قوسالقى شارۋاشىلىقتاردى دامىتۋ ماسەلەلەرى بويىنشا جاۋاپكەرشىلىك كۇشەيتىلدى، وسى ماسەلە بويىنشا اۋىل تۇرعىندارى الدىندا اكىمدەردىڭ ەسەپ بەرۋ نورماسى ەنگىزىلدى»،- دەلىنگەن اشم باسپا ءسوز قىزمەتىنىڭ حابارلاماسىندا.

اتالعان زاڭدى قابىلداۋ جەكە قوسالقى شارۋاشىلىقتارعا ولاردىڭ كووپەراتيۆتەرى ارقىلى جۇرگىزىلەتىن مەملەكەتتىك قولداۋ شارالارىن كورسەتۋدىڭ زاڭنامالىق نەگىزىن قالاۋعا مۇمكىندىك بەرەدى. مۇنداعى باستى ماسەلە كووپەراتيۆتەردىڭ ءوز مۇشەلەرىنە كورسەتەتىن قىزمەتتەرىنىڭ قۇنىن سۋبسيديالاۋ بولىپ تابىلادى.