جەتىسۋ وبلىسىنىڭ اكىمدىگى قايدا ورنالاساتىنى ايتىلدى

الداعى ۋاقىتتا نەكەنى تىركەۋ جەرگىلىكتى جۇمىسپەن قامتۋ جانە الەۋمەتتىك قورعاۋ باسقارماسىنىڭ عيماراتىندا جۇرگىزىلەتىنى بەلگىلى بولدى

جەتىسۋ وبلىسىنىڭ اكىمدىگى تالدىقورعانداعى نەكە سارايى عيماراتىندا ورنالاسادى. بۇل اقپاراتتى الماتى وبلىسى اكىمدىگى راستادى، - دەپ حابارلايدى Almaty-akshamy.kz Tengrinews.kz-كە سىلتەمە جاساپ.

«بۇل ۋاقىتشا. سالتانات سارايى عيماراتى جۇمىس كۇندەرى بوس بولعان سوڭ تاڭدالدى، سالتاناتتى ءىس-شارالار وتكىزىلمەيدى»، - دەدى الماتى وبلىسى اكىمىنىڭ باسپا ءسوز حاتشىسى رۋسلان ەربوتا.

احاج عيماراتىنىڭ جالپى اۋدانى - 3531 شارشى مەتر. مۇندا تالدىقورعان جانە وبلىستىڭ جاقىن اۋداندارىنىڭ جاس جۇبايلارى تىركەلگەن.
الداعى ۋاقىتتا نەكەنى تىركەۋ جەرگىلىكتى جۇمىسپەن قامتۋ جانە الەۋمەتتىك قورعاۋ باسقارماسىنىڭ عيماراتىندا جۇرگىزىلەتىنى بەلگىلى بولدى. سالتاناتتى نەكە قيۋ ءراسىمى بيكەن ريموۆا اتىنداعى تەاتردا وتەدى.

ايتا كەتەيىك، تالدىقورعانداعى نەكە سارايى 2017 جىلى سالىنعان ەدى. قۇرىلىسقا ءبىر ميللياردتان اسا قاراجات جۇمسالعان. عيماراتتا قالىڭدىق پەن كۇيەۋ جىگىتتىڭ بولمەلەرى، نەكەنى سالتاناتتى تىركەۋ زالى، قوناقتارعا ارنالعان كۇتۋ زالى، 160 ورىندىق مەيرامحانا، كەڭ حولل جانە ءماجىلىس زالى بار.