2030 جىلعا دەيىنگى «جەتىسۋ وبلىسىن كەشەندى گازداندىرۋ» وڭىرلىك سحەماسى اياسىندا ايماقتاعى 358 ەلدى مەكەننىڭ 192-سىنە تابيعي وتىن جەتكىزۋ كوزدەلىپ وتىر. قازىرگى تاڭدا 84 اۋىلعا ينفراقۇرىلىم تارتىلىپ، بۇل جالپى جوسپاردىڭ 58،2%-ىن قۇراپ وتىر. ناتيجەسىندە 400 مىڭنان استام ادام (101،8 مىڭ ابونەنت) ءومىر ساپاسىن جاقسارتۋعا مۇمكىندىك الدى، دەپ حابارلايدى aqshamnews.kz
پرەزيدەنت تاپسىرماسىنا سايكەس، 2025 جىلى تاعى 42 ەلدى مەكەنگە كوگىلدىر وتىن بەرىلەدى دەپ جوسپارلانعان. وسى ماقساتتا رەسپۋبليكالىق جانە جەرگىلىكتى بيۋدجەتتەردەن جالپى سوماسى 7،9 ملرد تەڭگە ءبولىندى، ونىڭ ىشىندە 21 جوبا – 2024 جىلدان وتپەلى. قوعالى اۋىلىنان باسقا بارلىق نىسانداردا جۇمىستار اياقتالدى. بۇل ەلدى مەكەندە گاز قۇبىرىنىڭ 80 شاقىرىمىنان 35 شاقىرىمى تارتىلدى.
24 جاڭا جوبا بويىنشا 3،5 ملرد تەڭگە يگەرىلدى، الداعى ۋاقىتتا تاعى 18 جوبانىڭ قۇرىلىسى باستالماق. بۇل جۇمىستاردىڭ جالپى قۇنى – 15،9 ملرد تەڭگە. اتالعان جوبالاردى اياقتاۋ ءۇشىن ەنەرگەتيكا مينيسترلىگى قوسىمشا 25،6 ملرد تەڭگەگە بيۋدجەت ءوتىنىمىن جولدادى.
اتقارىلىپ جاتقان شارالاردىڭ ناتيجەسىندە جەتىسۋ وبلىسىندا كوگىلدىر وتىنعا قوسىلاتىن ەلدى مەكەندەردىڭ سانى 126-عا جەتىپ، قامتۋ دەڭگەيى 71،4%-دى قۇرايتىن بولادى. بۇل – 500 مىڭنان استام تۇرعىننىڭ تۇرمىستىق جاعدايىن جاقسارتۋ دەگەن ءسوز.
سونىمەن قاتار، قازىرگى سحەماعا ەنبەگەن تاعى 22 اۋىل بويىنشا جوبالىق-سمەتالىق قۇجاتتاما ازىرلەنىپ جاتىر.
انىقتاما ءۇشىن:
2022–2024 جىلدار ارالىعىندا رەسپۋبليكا كولەمىندە 371،1 ملرد تەڭگە ءبولىنىپ، 14 مىڭ شاقىرىمنان استام گاز قۇبىرى تارتىلدى. ەلدەگى گازداندىرۋ دەڭگەيى 62،4%-عا جەتىپ، تابيعي وتىنمەن قامتىلعان حالىق سانى 11 ملن-نان 12،6 ملن ادامعا ارتتى.