«باتىل تويتارىس - 2023»
مەملەكەت باسشىسى قاسىم-جومارت توقايەۆتىڭ كۇشتىك قۇرىلىمداردى ءتيىمدى ۇيلەستىرۋدى قامتاماسىز ەتۋ، ولاردىڭ جەدەل جانە اسكەري-تەحنيكالىق ۇيلەسىمدىلىگىن جولعا قويۋ، سونداي-اق ۆەدومستۆوارالىق ۇيلەسىمدىلىكتى نىعايتۋ جونىندەگى تاپسىرمالارىن ورىنداۋ اياسىندا ەلىمىزدە «باتىل تويتارىس - 2023» وقۋ-جاتتىعۋى وتەدى، دەپ حابارلايدى Almaty-akshamy.kz.
5 ساۋىردە جەتىسۋ وبلىسىندا "كوكتال" وقۋ پوليگونىندا "باتىل تويتارىس" ستراتەگيالىق كوماندالىق-شتابتىق وقۋ-جاتتىعۋىنىڭ ءبىرىنشى كەزەڭى شەڭبەرىندە ۆەدومستۆوارالىق "بەكەت" وقۋ-جاتتىعۋى جانە ق ر قارۋلى كۇشتەرى دەسانتتىق-شابۋىلداۋ اسكەرلەرى بولىمشەلەرىمەن تاكتيكالىق وقۋ-جاتتىعۋدىڭ بەلسەندى كەزەڭى وتەدى.
وقۋ-جاتتىعۋ بارىسىندا دەسانتتىق-شابۋىلداۋ اسكەرلەرى، ۇقك شەكارا قىزمەتى، توتەنشە جاعدايلار مينيسترلىگى جانە ۇلتتىق ۇلاننىڭ بولىمشەلەرىمەن بىرلەسە وتىرىپ تاۋلى جاعدايلاردا جانە ەلدى مەكەندە ۇرىس جۇرگىزۋ ءىس-قيمىلدارىن پىسىقتاپ، ءار ءتۇرلى ادىسپەن دەسانتتاۋدى ورىندايدى.
قازىرگى زامانعى اسكەري قاقتىعىستاردىڭ تاجىريبەسىن ەسكەرە وتىرىپ، ءتۇرلى ۆەدومستۆولىق توپتاردى قولدانۋدى ۇيىمداستىرۋدا جاڭا تاسىلدەر سىناقتان وتكىزىلەتىن بولادى.
وقۋ-جاتتىعۋعا 2500-دەن استام اسكەري قىزمەتشى جانە 900-گە جۋىق قارۋ مەن اسكەري تەحنيكا بىرلىگى، سونىڭ ىشىندە ارميالىق، اسكەري-كولىكتىك، مايدان اۆياسياسى جانە ۇشقىشسىز ۇشۋ اپاراتتارى قاتىسادى.