اۋىل شارۋاشىلىعى مەن كاسىپكەرلىك تە وبلىس بيۋدجەتىنەن قولداۋ تاپتى.
الماتى وبلىسىندا قارجىنىڭ باسىم بولىگى ءبىلىم بەرۋ مەن دەنساۋلىق ساقتاۋ جانە الەۋمەتتىك قولداۋ شارالارىنا جۇمسالادى. بۇل تۋرالى قارجىلىق قۇجاتقا ەنگىزىلگەن وزگەرىستەر مەن تولىقتىرۋلار بارىسىندا ايتىلدى، دەپ حابارلايدى Almaty-akshamy.kz.
«2021-2023 جىلدارعا ارنالعان وبلىس بيۋدجەتىنىڭ قاي سالالارعا باعىتتالاتىنى جاڭا وزگەرىستەر مەن تولىقتىرۋلار نەگىزىندە بەكىتىلدى. قارجىنىڭ باسىم بولىگى ءبىلىم بەرۋ مەن دەنساۋلىق ساقتاۋ جانە الەۋمەتتىك قولداۋ شارالارىنا جۇمسالادى. سول سياقتى تۇرعىن ۇي-كوممۋنالدىق شارۋاشىلىق، قۇرىلىس، مادەنيەت پەن سپورت سالالارى دا نازاردان تىس قالعان جوق. اۋىل شارۋاشىلىعى مەن كاسىپكەرلىك تە وبلىس بيۋدجەتىنەن قولداۋ تاپتى»،– دەلىنگەن الماتى وبلىسى اكىمدىگىنىڭ باسپا ءسوز قىزمەتىنىڭ حابارلاماسىندا.
وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى جومارت ءامىرحانوۆتىڭ ايتۋىنشا، الماتى وبلىسىنىڭ بيۋدجەتىنە جالپى سوماسى 55 ملرد. تەڭگە بولاتىن ماقساتتى ترانسفەرتتەر قوسىمشا بولىنگەن. بيۋدجەتتىڭ نەگىزگى شىعىندارى ەڭ الدىمەن الەۋمەتتىك سالالارعا، سول سياقتى Nur Otan پارتياسىنىڭ 2021-2025 جىلدارعا ارنالعان باعدارلاماسىنداعى مىندەتتەردى جۇزەگە اسىرۋعا باعىتتالادى.
بۇل رەتتە، ماسەلەن، ەسكەلدى، قاراتال، كوكسۋ، قاراساي جانە سارقان اۋداندارىندا جاڭا مەكتەپتەردىڭ قۇرىلىسى باستالادى. قۇرىلىس جۇمىستارىن باستاۋعا 600 ملن. تەڭگەدەن استام قارجى بولىنگەن. «جۇمىسپەن قامتۋ جول كارتاسى» شەڭبەرىندە وبلىستىڭ اۋداندارى مەن تالدىقورعان قالاسىندا تاعى 7 مەكتەپتىڭ قۇرىلىسىنا، سول سياقتى الاكول اۋدانىنداعى لاگەردى قايتا جاڭعىرتۋعا ۇلتتىق قوردان 7،6 ملرد تەڭگە باعىتتالادى. سونىمەن بىرگە بالالاردىڭ قاۋىپسىزدىگىن قامتاماسىز ەتۋ ماقساتىندا مەكتەپتەرگە دابىل تەتىكتەرى، تۋرنيكەتتەر ورناتىپ، ارنايى كۇزەت قويۋعا دا قارجى قاراستىرىلعان.