اۋداننىڭ الەۋمەتتىك ينفراقۇرىلىمىن دامىتۋ جۇمىسى قارقىندى جالعاسۋدا.
بۇل تۋرالى الماتى اكىمى ەربولات دوسايەۆتىڭ جەتىسۋ اۋدانى تۇرعىندارىمەن وتكەن كەزدەسۋىندە ايتىلدى، دەپ حابارلايدى Almaty-akshamy.kz.
ماسەلەن، بۇگىندە "كەمەل" شاعىناۋدانىندا اۋىسىمىنا 200 ادام قابىلدايتىن وتباسىلىق-دارىگەرلىك امبۋلاتوريانىڭ قۇرىلىسى اياقتالىپ كەلەدى. قازىرگى ۋاقىتتا جۇمىستار 80% ورىندالدى. قۇرىلىس ءساۋىر ايىندا اياقتالادى دەپ جوسپارلانۋدا.
وتكەن جىلى اكىمدىك جەكە مەنشىكتەن نۇسىپبەكوۆ جانە وماروۆ كوشەلەرىندەگى ەكى عيماراتتى ساتىپ الدى. كەيىن ولاردا اۋىسىمىنا 200 جانە 300 كەلۋشىگە ارنالعان ەمحانالار اشىلاتىن بولادى.
«سونىمەن قاتار ءبىز رابوچيي (جۇمىسشى) كەنتى جايلى ۇمىتقان جوقپىز. بۇگىندە 40 مىڭ تۇرعىننىڭ 34 مىڭعا جۋىعى المالى اۋدانىنىڭ ەمحانالارىنا تىركەلگەن. اكىمدىك رايىمبەك داڭعىلىنىڭ بويىنداعى اۋدانى 1،5 مىڭ شارشى مەتردى قۇرايتىن عيماراتتى انىقتادى. ونى ناۋرىز ايىنىڭ سوڭىنا دەيىن ساتىپ الۋعا نيەتتىمىز. وندا جوندەۋ جۇمىستارى جۇرگىزىلىپ، جابدىقتار ساتىپ الىنعاننان كەيىن، 240 ادام قابىلدايتىن ەمحانا اشىلادى»، - دەدى قالا باسشىسى ە.دوسايەۆ.
اتالعان ەمحانالاردىڭ اشىلۋى جەتىسۋ اۋدانىنىڭ تۇرعىندارىنا جاقىن جەردەن قىزمەت كورسەتۋگە جانە جۇمىس ىستەپ تۇرعان ءۇش ەمحانانىڭ جۇكتەمەسىن ازايتۋعا مۇمكىندىك بەرەدى.
اۋدان تۇرعىندارىمەن وتكەن كەزدەسۋدە مەكتەپتەر جايى دا تالقىعا سالىندى.
«2022 جىلى 2 مەكتەپتە(300 ورىندىق № 57، 575 ورىندىق № 177) 875 ورىندىق قوسىمشا عيمارات پايدالانۋعا بەرىلدى جانە №148 مەكتەپكە
200 ورىندىق قوسىمشا عيماراتتى سالۋ جۇمىستارى باستالدى. ونى جاڭا وقۋ جىلى باستالعانعا دەيىن اياقتايمىز»، - دەدى الماتى اكىمى.
اۋدان مەكتەپتەرىندەگى وقۋشى ورىندارىنىڭ جاعدايى سالىستىرمالى تۇردە جاقسى (بۇگىنگى كۇنى شامامەن 3000 ورىن تاپشى). ءبىراق حالىق سانىنىڭ ءوسۋى مەن اۋداندا تۇرعىن ۇيلەردىڭ قارقىندى سالىنىپ جاتقانىن ەسكەرىپ، بيىل بورالداي كوشەسىندە («جايلى مەكتەپ» ۇلتتىق جوباسى) 1200 ورىندىق جاڭا مەكتەپ پەن بۇرىننان بار مەكتەپتەرگە 450 ورىندىق ەكى قوسىمشا عيماراتتىڭ قۇرىلىسىن باستاۋ جوسپارلانىپ وتىر.