الماتى قالاسى جەتىسۋ اۋدانىنىڭ اكىمى گۇلنار كوكەبايەۆا «بيۋدجەتكە قاتىسۋ» باعدارلاماسىنىڭ ورىندالۋى تۋرالى ايتتى. باعدارلامانىڭ ارقاسىندا كەز كەلگەن اۋدان تۇرعىنى اۋلانى، كوشەنى نەمەسە الاڭدى اباتتاندىرۋ بويىنشا ءوز جوباسىن ۇسىنا الادى. بارلىعى 18 جوبانى جۇزەگە اسىرۋعا 785 ملن قاراستىرىلعان دەپ حابارلايدى almaty-akshamy.kz
گۇلنار كوكەبايەۆا وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسى بارىسىندا ايتقانداي، الدىن الا اركىم قالالىق ورتانى دامىتۋ بويىنشا ءوز يدەياسىن ۇسىنا الادى. نەگىزىندە اۋلالاردى جوندەۋ مەن قايتا جاڭارتۋ بويىنشا ۇسىنىستار بولدى.
«اۋدان تۇرعىندارى اۋماقتى اباتتاندىرۋدى قالايدى، ونى جاياۋ جۇرۋگە دە، كولىكتەردىڭ وتۋىنە دە ىڭعايلى ەتىپ جاساعىسى كەلدى. «بيۋدجەتكە قاتىسۋ» اياسىندا اۋلانى جاڭارتۋعا مۇمكىندىك بولعانى جاقسى، سەبەبى تۇرعىندار بارلىق جۇمىستارعا قوماقتى قاراجات جيناي المايتىن ەدى. ارينە، جوندەۋدەن كەيىن تۇرعىنداردىڭ نەگىزگى مىندەتى – اۋلانى كۇتۋ، اباتتاندىرۋدىڭ جىلدار بويى قىزمەت جاساۋىن قامتاماسىز ەتۋ»، - دەيدى گۇلنار كوكەبايەۆا.
جەتىسۋ اۋدانىنىڭ اكىمى «بيۋدجەتكە قاتىسۋ» جوباسى اياسىندا اينابۇلاق جانە قۇلاگەر شاعىناۋداندارىنىڭ 101 اۋلاسىندا اعىمداعى جوندەۋ جۇمىستارى جۇرگىزىلىپ جاتقانىن جانە ولاردىڭ 90 پايىزعا ورىندالعانىن حابارلادى. ءبىز ءقازىردىڭ وزىندە اينابۇلاق-3 شاعىناۋدانىندا، پاللادين، وماروۆ كوشەلەرىنىڭ، سەيفۋللين، نازاربايەۆ داڭعىلدارىنىڭ بويىندا جانە قۇلاگەر شاعىناۋدانىندا التى سكۆەر سالدىق. التى زيراتتىڭ اۋماعى دا رەتكە كەلتىرىلدى، جولدار اسفالتتالدى جانە اپاتتى اعاشتاردى كەسۋ مەن سانيتارلىق كەسۋ جۇمىستارى جۇرگىزىلدى.
«بيۋدجەتكە قاتىسۋ» باعدارلاماسى اياسىندا بيىل كوكجيەك شاعىناۋدانىندا جەكپە-جەك سپورت ورتالىعىنىڭ قۇرىلىسى اياقتالدى جانە كوكمايىس شاعىناۋدانىنداعى ەسەنتاي وزەنىنىڭ بويىندا ساياباقتىڭ جاعالاۋ ايماعىنىڭ قۇرىلىسى باستالدى. جاعالاۋدىڭ جالپى اۋدانى 16 گا، ونىڭ ىشىندە جاسىل جەلەكتەردىڭ اۋدانى 7000 شارشى مەتردەن اسادى، ال عيماراتتىڭ اۋدانى شامامەن 500 شارشى مەتردى قۇرايدى. قۇرىلىستى 2022 جىلدىڭ اقپانىندا اياقتاۋ جوسپارلانعان.
گ. كوكەبايەۆانىڭ ايتۋىنشا، جەتىسۋ اۋدانىندا كوپ قاباتتى ۇيلەردىڭ قاسبەتتەرىن اعىمداعى جوندەۋ جۇمىستارى جالعاستى. مىسالى، قۇلاگەر شاعىناۋدانىندا 18 كوپ قاباتتى ءۇيدىڭ كەلبەتى بىردەن وزگەرەدى. ال ءۇش ءۇيدىڭ قابىرعالارىنا ەل تاۋەلسىزدىگىنىڭ 30 جىلدىعى مەن جەتىسۋ ءوڭىرىنىڭ 85 جىلدىعىنا ارنالعان مۋرالدار سالىندى.
سونىمەن قاتار، اۋدان تۇرعىندارىنىڭ كوپتەگەن وتىنىشتەرى بويىنشا جەكە سەكتوردا: لوباچيەۆسكيي، سامىرسىن، گاليلەي، جيدەباي، ەلامان، رىسقۇلوۆ، شەليحوۆ، بورزوۆ، تايمىرسكيي، موچالوۆ كوشەلەرىندە ويىن الاڭدارىن ورناتۋ جۇمىستارى جۇرگىزىلۋدە. بارلىق جۇمىستار اعىمداعى جىلدىڭ تامىز ايىندا اياقتالادى.