مەديسينالىق قىزمەت قادامدىق قولجەتىمدىلىكتە – الماتىنىڭ جەتىسۋ اۋدانىندا جاڭا ەمحانا اشىلادى، دەپ حابارلايدى almaty-akshamy.kz
جۇمىس ساپارى بارىسىندا قالا اكىمى ەربولات دوسايەۆ 2023 جىلى ەمحانا رەتىندە ساتىپ الىنعان عيماراتتى قايتا جاڭارتۋمەن جانە كۇردەلى جوندەۋ بارىسىمەن تانىستى. رايىمبەك داڭعىلى، 263/2 مەكەنجايىنداعى جاڭا مەديسينالىق مەكەمە مەديسينالىق-سانيتارلىق العاشقى كومەكتىڭ (مساك) ءبىرىڭعاي ستاندارتىنا سايكەس جۇمىس ىستەۋگە كوشكەن، ول بىلتىردان باستاپ الماتىدا ەنگىزىلە باستاعان.
جالپى اۋدانى 1547 شارشى مەتر بولاتىن 4 قاباتتى عيمارات №33 ەمحانانىڭ بالانسىنا بەرىلدى. ءۇي-جايدى ىشكى جوندەۋ جانە ارلەۋ اياقتالدى. مەديسينالىق جيھاز جانە جابدىق ساتىپ الىنىپ جاتىر.
ءبىر اۋىسىمدا 240 ادام قابىلداۋعا ەسەپتەلگەن ەمحاناعا جەتىسۋ اۋدانىنىڭ 30 مىڭ تۇرعىنى تىركەلەدى. بۇرىن المالى اۋدانىنىڭ №5 جانە №8 ەمحاناسىنا مەديسينالىق كومەككە جۇگىنگەن «جۇمىسشىلار كەنتى» الابىنىڭ جانە جاقىن ماڭداعى شاعىن اۋدان تۇرعىندارىنا «قادامدىق قولجەتىمدىلىك» قاعيداتى بويىنشا ساپالى مەديسينالىق قىزمەت كورسەتىلەدى.
گينەكولوگ، وتولارينگولوگ، وفتالمولوگ، نيەۆروپاتولوگ، فۋنكسيونالدىق دياگنوستيكا دارىگەرى، كارديولوگ جانە ت.ب. جالپى 234 جوعارى بىلىكتى ماماننان تۇراتىن مەديسينالىق مەكەمەنىڭ شتاتى قالىپتاسىپ جاتىر.
قالا باسشىسىنا قازىرگى ۋاقىتتا مەديسينالىق ليسەنزيا الۋ بويىنشا جۇمىستار جۇرگىزىلىپ جاتقانى باياندالدى. سونىمەن قاتار، سانيتارلىق تالاپقا سايكەس بولۋ ءۇشىن جاقىن جەردە ورنالاسقان كولىك جۋۋ ورنىن ساتىپ الۋ قاجەت.
جاقىن ماڭداعى الاپتاردىڭ تۇرعىندارى اكىمگە مەديسينالىق مەكەمەنىڭ اشىلۋىن اسىعا كۇتەتىنىن ايتتى. جەر يەسى ۇسىنىلعان وتەماقىمەن كەلىسپەگەن كورىنەدى. ەندى جەر تەلىمىن الىپ قويۋ ماسەلەسى سوت ارقىلى شەشىلەدى، سودان كەيىن مەديسينالىق مەكەمە العاشقى پاسيەنتتى قابىلداۋعا كىرىسەدى.
جەتىسۋ اۋدانىندا قادامدىق قولجەتىمدىلىكتى قامتاماسىز ەتۋ جانە مەديسينالىق كومەكتىڭ ساپاسىن ارتتىرۋ اياسىندا بيىل تاعى ەكى جاڭا ەمحانا اشۋ جوسپارلانعان. اتاپ ايتساق، وماروۆ كوشەسىندەگى ءبىر اۋىسىمدا 300 كەلۋشىگە جانە نۇسىپبەكوۆ كوشەسىندە ءبىر اۋىسىمدا 200 كەلۋشىگە ارنالعان ەمحانا.
ول ءۇشىن قالا اكىمدىگى مەديسينالىق مەكەمەگە قويىلاتىن تالاپقا سايكەس عيماراتتاردى ساتىپح الدى. ءقازىر وندا كۇردەلى جوندەۋ جۇمىستارى جۇرگىزىلىپ جاتىر.
بۇگىندە جەتىسۋ اۋدانىندا 200 مىڭعا جۋىق ادام تۇرادى. اۋداندا №11، №21 جانە «قۇلاگەر» ەمحاناسى سىندى ءۇش قالالىق ەمحانا جۇمىس ىستەيدى. وسى جىلدىڭ ماۋسىم ايىندا «كەمەل» شاعىن اۋدانىندا اۋىسىمىنا 200 كەلۋشىگە ارنالعان وتباسىلىق دارىگەرلىك امبۋلاتوريا اشىلدى.