الماتى قالاسىندا 95 مەملەكەتتىك قىزمەتشىنىڭ تىنىعۋ ۋاقىتتارى قالپىنا كەلتىرىلدى. بۇل شارا مەملەكەتتىك قىزمەتكەرلەردىڭ جۇمىس ۋاقىتى رەجيمىن ساقتاۋ بويىنشا قۇقىقتارىن قورعاۋعا باعىتتالعان.
جۇمىس پروسەسىن وڭتايلاندىرۋ، ەڭبەك تيىمدىلىگىن ارتتىرۋ جانە تاپسىرمالاردى ورىنداۋ مەرزىمدەرىن ساقتاۋ ءۇشىن جۇمىس ۋاقىتىن ناقتى جوسپارلاۋ جانە باقىلاۋ وتە ماڭىزدى. مەملەكەتتىك قىزمەتشى جۇمىس بەرۋشىنىڭ اكتىلەرىنە سايكەس لاۋازىمدىق مىندەتتەرىن ورىنداعان ۋاقىت، سونداي-اق ەڭبەك زاڭناماسىنا سايكەس جۇمىس ۋاقىتىنا جاتقىزىلعان وزگە دە ۋاقىت كەزەڭدەرىن جۇمىس ۋاقىتى دەپ اتايدى. جۇمىس ۋاقىتىن دۇرىس ۇيىمداستىرۋ باسشىعا دا، قىزمەتكەرلەرگە دە بىردەي قاجەت.
قازاقستان رەسپۋبليكاسىنىڭ مەملەكەتتىك قىزمەت ىستەرى اگەنتتىگىنە 2023 جىلدىڭ ناۋرىز ايىندا جۇمىس ۋاقىتى رەجيمىنىڭ ساقتالۋىن مونيتورينگىلەۋ بويىنشا قۇزىرەت بەرۋ جونىندەگى زاڭنامالىق تۇزەتۋلەر ەنگىزىلدى. بۇل تۇزەتۋلەر جۇمىس بەرۋشىنىڭ جۇمىس ۋاقىتى رەجيمىن بۇزعانى ءۇشىن جاۋاپكەرشىلىگىن قاتاڭداتۋعا ارنالعان قاجەتتى قۇرال بولىپ تابىلادى. اگەنتتىك ءتوراعاسىنىڭ 2023 جىلعى 29 مامىرداعى №121 بۇيرىعىمەن مەملەكەتتىك ورگانداردىڭ جۇمىس ۋاقىتى رەجيمىنىڭ ساقتالۋىنا مونيتورينگ جۇرگىزۋ قاعيدالارى بەكىتىلدى.
مونيتورينگ مەملەكەتتىك ورگانعا بارماي-اق تۇراقتى نەگىزدە جۇزەگە اسىرىلادى. اقپاراتتىق جۇيەلەردە كورسەتىلگەن مالىمەتتەر، ۋاكىلەتتى ورگانعا نە ونىڭ اۋماقتىق بولىمشەلەرىنە مەملەكەتتىك ورگاندار ۇسىناتىن دەرەكتەر، قولجەتىمدىلىكتى باقىلاۋ جانە باسقارۋ جۇيەسىنىڭ دەرەكتەرى، بۇقارالىق اقپارات قۇرالدارىندا جانە الەۋمەتتىك جەلىلەردە جاريالانىمدار بارماي جۇمىس ۋاقىتى رەجيمىنىڭ ساقتالۋىنا مونيتورينگ جاساۋ كوزى بولىپ تابىلادى.
2024 جىلدىڭ 1 توقسانىندا اگەنتتىكتىڭ الماتى قالاسى بويىنشا دەپارتامەنتى 15 مەملەكەتتىك ورگاندا جۇمىس ۋاقىتى رەجيمىن ساقتاۋ مونيتورينگى جۇرگىزىلدى. ناتيجەسىندە 56 قىزمەتكەردىڭ جۇمىس ۋاقىتى رەجيمىن ساقتاۋ بويىنشا قۇقىقتارى بۇزىلعان فاكتىلەرى انىقتالدى. سونىمەن قاتار، 95 مەملەكەتتىك قىزمەتشىگە تىنىعۋ ساعاتتارى بەرىلدى.
اگەنتتىك مەملەكەتتىك ورگانداردا جۇمىس ۋاقىتى رەجيمىن ساقتاۋ بويىنشا مونيتورينگتى جالعاستىرادى. بۇل شارا قىزمەتكەرلەردىڭ قۇقىقتارىن قورعاۋعا جانە جۇمىس بەرۋشىلەردىڭ زاڭنامانى تولىق ورىنداۋىنا باعىتتالعان. مەملەكەتتىك قىزمەتشىلەردىڭ قۇقىقتارى بۇزىلماۋىن قامتاماسىز ەتۋ ماقساتىندا وسىنداي مونيتورينگتەر تۇراقتى نەگىزدە جۇرگىزىلىپ تۇرادى.