الماتى قالاسىنىڭ ساۋدا ورىندارىندا «ساپالى ءونىم» تۋرالى جانە جاڭا زاڭ جوبالارىنىڭ نورمالارىن ءتۇسىندىرۋ جۇمىستارىن جۇرگىزۋ بويىنشا جىلجىمالى ءموبيلدى زاڭ قىزمەتى جۇمىسىن جالعاستىرۋدا. ماقساتى – تۇرعىندارعا تۇتىنۋشىلىق قۇقىقتارىن قورعاي ءبىلۋى ءۇشىن اقپاراتتىق كەڭەستەر بەرۋ.
جىلجىمالى ءموبيلدى زاڭ قىزمەتىنىڭ مۇشەلەرى تۇسىندىرمە بارىسىندا «ساپالى ءونىم» جوباسىنىڭ باستى مىندەتى – ىشكى نارىقتا ازىق-تۇلىك ونىمدەرىنىڭ قاۋىپسىزدىگىن قامتاماسىز ەتۋگە باعىتتالعانىن جانە جاڭا زاڭ جوباسى قوعامنىڭ ءومىر ءسۇرۋ ساپاسىن ارتتىرۋعا، تۇتىنۋشىلاردىڭ قۇقىقتارىن قورعاۋ ماسەلەلەرىندە ۇكىمەتتىك ەمەس ينستيتۋتتاردىڭ ءرولىن كۇشەيتۋگە باعىتتالعانىن حالىققا جەتكىزۋ. سالا ماماندارى اشىق الاڭدا، ەركىن فورماتتا وتكىزىپ جۇرگەن جۇزدەسۋلەردە وسى ماسەلەلەردى تۇسىندىرۋدە. ال ءوز كەزەگىندە قالا تۇرعىندارى دا تولعاندىرىپ جۇرگەن سۇراقتارىن قويىپ، پىكىرلەرىمەن بولىسەدى.
بۇل جوبانى الماتى قالاسى قوعامدىق دامۋ باسقارماسىنىڭ مەملەكەتتىك الەۋمەتتىك تاپسىرىسى نەگىزىندە جانە الماتى قالاسى بويىنشا ساۋدا جانە تۇتىنۋشىلاردىڭ قۇقىعىن قورعاۋ دەپارتامەنتىنىڭ باعىت بەرۋىمەن حالىقارالىق «جاناشىر» قوعامدىق قورى جۇزەگە اسىرۋدا. ءموبيلدى زاڭ قىزمەتى قالانىڭ بارلىق اۋدانىنداعى بازارلار مەن ساۋدا ورتالىقتارىندا بولىپ، حالىققا تۇتىنۋشىلىق قۇقىقتارىن قورعاۋ ماسەلەلەرى بويىنشا زاڭگەرلىك كەڭەستەر بەرۋدە.
قازىرگى كۇنى اۋەزوۆ، المالى، الاتاۋ اۋداندارىنداعى ساۋدا ورتالىقتارىندا تۇتىنۋشىلارعا كەڭەستەر بەردى. ءىس-شارا بارىسىندا تۇتىنۋشىلارمەن ساۋالنامالار جۇرگىزىلىپ، اقپاراتتىق پاراقشالار تاراتىلۋدا.
وسى جىلدىڭ سوڭىنا دەيىن جالعاساتىن جوبا بارىسىندا قالاداعى ساۋدا ورىندارى، مەكەمەلەر، جوعارى وقۋ ورىندارى ستۋدەنتتەرى اراسىندا وقىتۋ-ۇيرەتۋ جۇمىستارىن جۇرگىزبەك. سونىمەن قاتار، Instagram، Facebook، Telegram الەۋمەتتىك جەلىلەرىندە «تۇتىنۋشى- پوترەبيتەل» اتتى اقپاراتتىق اككاۋنتتار اشىلىپ، WhatsApp جەلىسىندە 8 700 862 84 54 نومىرىنە ازاماتتاردىڭ سۇراقتارى مەن شاعىمدارى قابىلدانۋدا.
بۇل باستاما الماتى قالاسىنىڭ تۇرعىندارىنا تۇتىنۋشى رەتىندەگى ءوز قۇقىقتارى تۋرالى كوبىرەك حاباردار بولۋعا جانە قاجەت بولعان جاعدايدا ولاردى ءتيىمدى قولدانۋعا مۇمكىندىك بەرەدى.
مەيرامكۇل جۇبانوۆا، المالى اۋدانىنىڭ تۇرعىنى:
– بيىل مامىردىڭ باسىندا دەزينفەكسيا جاسايتىن جاۋاپكەرشىلىگى شەكتەۋلى سەرىكتەستىكپەن ۇيىمە دەزينفەكسيا جاساتۋعا كەلىسىمشارتقا وتىرىپ، قولما-قول 60 مىڭ تەڭگە تولەگەن بولاتىنمىن. ءبىراق ولار ءالى كۇنگە دەيىن دەزينفەكسيا جاسامادى. حابارلاسسام، تەلەفونىن كوتەرمەيدى. قايدا جۇگىنەرىمدى بىلمەي وتىر ەدىم. ادام كوپ جۇرەتىن ورىندارعا ارنايى كەلىپ وتىرعان جىلجىمالى ءموبيلدى زاڭ قىزمەتىنىڭ كەڭەستەرى جاقسى بولدى، ەندى ءتيىستى ورىندارعا جازىپ، ءوزىمنىڭ تۇتىنۋشى رەتىندەگى قۇقىمدى قورعايتىن بولامىن.