الماتى وبلىسىندا ءتۇرلى باعدارلامالاردى ىسكە اسىرۋدىڭ ارقاسىندا ءۇش مىڭعا جۋىق جۇمىس ورنى اشىلعان.
الماتى وبلىسىنىڭ ارۋلارى مەملەكەتتىك باعدارلامالار كومەگىنىڭ ارقاسىندا جەكە ىستەرىن دوڭگەلەنتە باستادى، دەپ حابارلايدى Almaty-akshamy.kz.
«ۇيعىر اۋدانىنىڭ تۇرعىنى يۋلدۋز تۋرايەۆا توقىما بۇيىمدارىن وندىرۋمەن اينالىسسا، تەكەلىلىك گۇلدانا ءومىرتاي قىزى كوفەينيا اشىپ، يگىلىگىن كورە باستادى. ەكەۋى دە ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ «ەڭبەك» باعدارلاماسىنا سايكەس «باستاۋ بيزنەس» وقىتۋ جوباسىنا قاتىسىپ، گرانتقا يە بولعاندار»، - دەپ حابارلايدى الماتى وبلىسى اكىمىنىڭ باسپا ءسوز قىزمەتى.
يۋلدۋز تۋرايەۆانىڭ ايتۋىنشا، ونىڭ ءاۋ باستان ىسمەرلىككە قابىلەتى مەن قىزىعۋشىلىعى ەرەكشە بولعان. سوندىقتان ول وسى باعىتتا جەكە بيزنەسىن اشۋدى ءجون كورگەن. وڭىرلىك كاسىپكەرلەر پالاتاسىنا جۇگىنىپ، «باستاۋ بيزنەس» جوباسى بويىنشا كاسىپكەرلىك نەگىزدەرىن وقىپ شىققان. كەيىن «جاس كاسىپكەر» باعدارلاماسى اياسىندا 500 مىڭ تەڭگە كولەمىندە گرانتقا يە بولىپ، بۇل قارجىعا قاجەتتى تىگىن ماشينالارىن ساتىپ العان، ءسويتىپ، ءوز سەحىن اشقان. بۇل ىستەن ءوزى عانا پايدا تاۋىپ وتىرعان جوق، سونىمەن قاتار جەرگىلىكتى جەتى تۇرعىندى جۇمىسپەن قامتىپ وتىر.
ال تەكەلى قالالىق اكىمدىگىنىڭ مالىمەتىنە سۇيەنسەك، جاس كاسىپكەر گۇلدانا ءومىرتاي قىزى مەملەكەتتىك گرانت ەسەبىنەن كوفەينيا اشقان. ونىڭ بۇل باستاماسىنا «بيزنەس باستاۋ» ارقىلى وقۋى ۇلكەن سەپ بولدى. ءۇش بالانىڭ اناسى گۇلدانا «بيزنەستىڭ جول كارتاسى 2020-2025» باعدارلاماسى اياسىندا 2 ملن تەڭگە گرانتقا يە بولىپ، قوعامدىق تاماقتاندىرۋ ورتالىعىن اشۋعا قاجەتتى قۇرال-جابدىقتار ساتىپ الدى. قالانىڭ ورتالىعىندا ورنالاسقان MELISSA كوفەينياسىندا ءقازىر 3 ادام جۇمىس ىستەيدى. وندا كوفە جانە باسقا دا سۋسىنداردان بولەك، كونديتەرلىك ونىمدەر دە پىسىرىلەدى.
كاسىپكەرلەر پالاتاسى تەكەلى قالالىق فيليالىنىڭ ديرەكتورى تۇرىسبەك ءجۇمادىلوۆ تەك بيىلدىڭ وزىندە «باستاۋ بيزنەس» كاسىپكەرلىك نەگىزدەرىنە وقىتۋدى 73 ادام اياقتاعانىن ايتادى.
رەسمي مالىمەتتەر بويىنشا، جالپى، بيىلعى جىلى الماتى وبلىسىندا «بيزنەستىڭ جول كارتاسى»، «جۇمىسپەن قامتۋ جول كارتاسى»، «ەڭبەك» باعدارلامالارى جانە «جەتىسۋ» وڭىرلىك باعدارلاماسى شەڭبەرىندەگى قارجى كولەمى 23 ملرد تەڭگەگە جەتكىزىلگەن. ءبىرىنشى جارتىجىلدىقتا جالپى سوماسى 7،5 ملرد تەڭگەلىك 990 جوبا قارجىلاندىرىلىپ، 2750 تۇراقتى جۇمىس ورنى اشىلعان.
