قاربىز بىر-ەكى كۇن كولەمىندە رەسەيگە جونەلتىلمەك
تۇركىستان وبلىسى جەتىساي اۋدانى اتامەكەن اۋىلدىق وكرۋگىنە قاراستى جەمىستى اۋىلىندا 1 گەكتار القاپتان 25 توننا قاربىز رەسەيگە ەكسپورتتالۋعا دايىن تۇر، دەپ حابارلايدى Almaty-akshamy.kz وبلىس اكىمدىگىنىڭ باسپا ءسوز قىزمەتىنە سىلتەمە جاساپ.
قاربىز تامشىلاتىپ سۋعارۋ ادىسىمەن وسىرىلگەن.
«تامشىلاتىپ سۋعارۋدىڭ پايداسى مول ەكەن. جىل سايىن 6 مىڭ ءتۇپ ەگەتىن ەدىم، وسى ادىسپەن بيىل 8 مىڭ ءتۇپ شىقتى. بۇل ءوز كەزەگىندە مول ءونىم الۋعا مۇمكىندىك بەرەدى. تامشىلاتىپ سۋعارۋدىڭ تاعى دا ءبىر ارتىقشىلىعى – تىڭايتقىش 5-6 ەسە از كەتەدى. قول كۇشىن دە كوپ قاجەت ەتپەيسىڭ. قاربىزدىڭ 60-65 كۇندە پىسەتىن «دولبىي» اتتى سورتىن ءساۋىر ايىندا ەكتىك. ءقازىر باعاسىن كەلىسسەك، 25 توننادان استام قاربىزدى ۇزەيىن دەپ جاتىرمىز. بۇعان دەيىن كەلىسىنە 210 تەڭگە ۇسىنىپ كەتتى، بۇل باعادان 20-30 تەڭگەگە جوعارىلاۋ باعانى كوزدەپ وتىرمىن»، – دەيدى «اتىمتاي» شارۋا قوجالىعىنىڭ ءتوراعاسى اتىمتاي وماروۆ.
قاربىز بىر-ەكى كۇن كولەمىندە رەسەيگە جونەلتىلمەك.
ايتا كەتەيىك، بيىل جەتىساي اۋدانى بويىنشا 17 مىڭ گەكتارعا باقشا داقىلدارى ەگىلگەن. «ءبىر القاپتان 2-3 ءونىم الۋ» جوباسى بويىنشا 1100 گەكتار اۋماقتا 236 جوبا ىسكە اسىرىلىپ جاتىر.