تاسجولداردىڭ تەز جارامسىز بولىپ قالۋىنا تاعى ءبىر سەبەپ - اۋىر جۇك كولىكتەرى
ەلىمىزدە جەرگىلىكتى ماڭىزى بار جولداردىڭ ساپاسىندا اقاۋ بارشىلىق. بيىل 2،7 ملرد تەڭگە جۇمسالعان جول قايتا سالىنعان. بۇل تۋرالى جول اكتيۆتەرى ۇلتتىق ساپا ورتالىعىنىڭ ديرەكتورى زامير ساعىنوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«جول ساپاسىن قاداعالاۋعا قاتىستى رەسپۋبليكالىق جولدار بويىنشا - مينيسترلىككە قاراستى اۆتوموبيلدەر كوميتەتىمەن، ال جەرگىلىكتى جولدار بويىنشا - اكىمدىكتەرمەن كەلىسىم جاسالعان. ياعني كەلىسىم بولسا، ءبىزدىڭ جول ساپاسىن تەكسەرۋگە قۇقىعىمىز بار. ارينە، جەرگىلىكتى جولدار بويىنشا تابىلىپ جاتقان اقاۋ كوپ. بيىل ءبىزدىڭ ۇسىنىسىمىزبەن 2،7 ملرد تەڭگەگە توسەلگەن جول قايتا سالىندى. جول مەردىگەر كومپانيانىڭ ەسەبىنەن سالىندى»، - دەدى زامير ساعىنوۆ ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
ۇلتتىق ورتالىق باسشىسىنىڭ سوزىنە سەنسەك، قۇزىرلى ورگاندار تاراپىنان جول ساپاسىنا قاتىستى قاداعالاۋ بار.
«ارينە، جەرگىلىكتى جولداردىڭ ساپاسىن قاداعالاۋ تولىق دەڭگەيدە ەمەس. سەبەبى بىزدە كەيبىر اكىمدىكتەرمەن كەلىسىمشارت جوق. سوندىقتان ماسەلە اشىق كۇيىندە قالىپ وتىر. تاسجولداردىڭ تەز جارامسىز بولىپ قالۋىنا تاعى ءبىر سەبەپ - اۋىر جۇك كولىكتەرى. دەگەنمەن سوڭعى ۋاقىتتا جەرگىلىكتى كولىك جولدارىنىڭ ساپاسىن قاداعالاپ وتىرمىز»، - دەيدى ول.
ايتا كەتەيىك، بريفينگتە بەلگىلى بولعانداي ەلىمىزدە اقىلى جولداردىڭ باعاسى وزگەرەدى.