زاڭ جوباسى 3 قىركۇيەككە دەيىن قوعامدىق تالقىلاۋدا بولادى.
ەلدەگى ءوڭىر اكىمدەرى وسىنداي جاڭا وكىلەتتىككە يە بولۋى مۇمكىن، دەپ حابارلايدى aqshamnews.kz
جاڭا ەرەجە بويىنشا ۇكىمەت جانىنداعى كەڭەستەردىڭ بىرىنە استانا، الماتى، شىمكەنت قالالارىنىڭ جانە وبلىستاردىڭ اكىمدەرىن كىرگىزۋ جوسپارلانعان.
جاڭا باستامانى سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى ۇسىنعان. قۇجاتتا اكىمدەردى ۇكىمەتتىڭ تەحنولوگيالىق ساياسات جونىندەگى كەڭەسىنىڭ قۇرامىنا ەنگىزۋ ۇسىنىلدى. ول كەڭەستىڭ قۇرامىنا پرەزيدەنتتىڭ عىلىم جانە يننوۆاسيالار جونىندەگى كەڭەسشىسى دە كىرەدى. ازىرگە قۇرامدا پرەمەر-مينيستر، بارلىق مينيسترلەر، سونداي-اق اگەنتتىكتەر مەن ۇلتتىق كومپانيالاردىڭ باسشىلارى بار.
زاڭ جوباسىن ازىرلەۋشىلەردىڭ ايتۋىنشا، بۇل اتقارۋشى بيلىك پەن يننوۆاسيالىق سالا وكىلدەرىنىڭ، سونداي-اق كاسىپكەرلىك سۋبەكتىلەرى اراسىنداعى جۇمىستى ۇيلەستىرۋگە مۇمكىندىك بەرەدى.
ايتا كەتسەك، ۇكىمەت جانىنداعى تەحنولوگيالىق ساياسات جونىندەگى كەڭەس 2022 جىلدان بەرى كونسۋلتاتيۆتىك-كەڭەسشى ورگان قىزمەتىن اتقارادى جانە مەملەكەتتىك تەحنولوگيالىق ساياساتتى قالىپتاستىرۋ جانە ىسكە اسىرۋ ماقساتىندا قۇرىلعان.