جەر تەلىمى جىلدام بەرىلە مە؟

ۇكىمەت تابيعي مونوپوليستەردىڭ وتىنىشتەرىن ۋاقتىلى قاراماعانى ءۇشىن اكىمشىلىك جاۋاپكەرشىلىكتى ەنگىزۋدى كوزدەپ وتىر. بۇل جونىندە پرەمەر-مينيستر ءاليحان سمايىلوۆ سيفرلاندىرۋ ماسەلەلەرى جونىندەگى كوميسسيانىڭ كەزەكتى وتىرىسىندا ايتتى.

"ءبىز ءار وڭىردەگى جاعدايدى جان-جاقتى قارايمىز. ەگەر جاڭا جىلدان باستاپ ادامدارعا رۇقسات بەرۋ تۇرىپ قالاتىن بولسا، وڭىرلەردەگى ءتيىستى جاۋاپتى تۇلعالاردى جۇمىستان بوساتۋعا دەيىن جاۋاپقا تارتامىز. ءبىز اتالعان مەملەكەتتىك قىزمەتتى اشىق قىلىپ، سيفرلاندىرعىمىز كەلەدى، ال باس جوسپارلار مەن ەجج قازىرگى مالىمەتتەرگە سايكەس كەلمەيدى. سوندىقتان كوپ جاعدايدا اۆتوماتتى تۇردە رۇقسات بەرىلمەي جاتادى. ءبىراق، ءبىز كەرى شەگىنبەيتىنىمىزدى ەرەكشە اتاپ وتكىم كەلەدى. ءبارىبىر العا جۇرەمىز. بۇل پروسەستى تەجەيتىندەردى جۇمىستان شىعارامىز. ولاردىڭ ورنىنا ءوز قىزمەتىن لايىقتى اتقارۋعا بەل بۋعان ادامداردى قويۋ كەرەك"، دەدى ءاليحان سمايىلوۆ

ۇكىمەت باسشىسى جەر قاتىناستارىن سيفرلاندىرۋ ماسەلەسى ينۆەستيسيالىق احۋالعا، سايكەسىنشە، جاڭا بيزنەس جوبالاردى ىسكە قوسۋ مەن جۇمىس ورىندارىن اشۋعا تىكەلەي قاتىستى ەكەنىن ايتتى. سوندىقتان سيفرلاندىرۋدىڭ ەكونوميكانى ودان ءارى دامىتۋ ءۇشىن ماڭىزى زور.

پرەمەر-مينيستردىڭ ايتۋىنشا، تالداۋ ناتيجەسىندە اكىمدىكتەر جۇكتەگەن سيفرلىق دەرەكتەردىڭ بارلىعى تالاپقا ساي ەمەس ەكەنى انىقتالعان. اتاپ ايتقاندا، قولدانىستاعى باس جوسپارلار مەن ەگجەي-تەگجەيلى جوسپارلاۋ جوبالارىنا (ەجج) تۇزەتۋ ەنگىزۋ قاجەت. سونىمەن قاتار پلاتفورمادا وتىنىمدەردى ۋاقتىلى قاراماۋ جانە نەگىزسىز باس تارتۋ فاكتىلەرى انىقتالدى.

"سيفرلاندىرۋدىڭ ءوزى ءدال وسى سىبايلاس جەمقورلىقتى ازايتۋعا جانە قاتە دەرەكتەر كولەمىن قىسقارتۋعا، سايكەس كەلمەيتىن كوورديناتتار بويىنشا جەر تەلىمدەرىن بەرۋ فاكتىلەرىن جويۋعا باعىتتالعان. بۇل ماسەلەلەردىڭ بارلىعى سيفرلاندىرۋ ناتيجەسىندە شەشىلۋى ءتيىس»، - دەدى".ءاليحان سمايىلوۆ

ايتا كەتەرلىگى، تاڭداۋ، ءوتىنىم بەرۋ مەن تىركەۋدەن باستاپ جەر تەلىمدەرىن بەرۋدىڭ بۇكىل پروسەسى ەلەكتروندى فورماتقا كوشىرىلدى. بارلىق بيزنەس-پروسەستەر تولىعىمەن قايتا قارالدى. قاجەتتى قادامدار سانى بىرنەشە ەسەگە ازايتىلدى، مەملەكەتتىك قىزمەت كورسەتۋ مەرزىمى شامامەن 1 جىلدان 30 كۇنگە دەيىن قىسقاردى.

جالپى، 1 شىلدە مەن 28 قاراشا ارالىعىندا جبمك ارقىلى 1 ملن-نان استام قىزمەت كورسەتىلدى، ونىڭ ىشىندە 238 مىڭ كاداسترلىق ءتولقۇجات بەرىلدى. 25 ملن-نان استام انىقتاما مەن مالىمەت قىزمەت الۋشىلاردان ءوتىنىش بەرمەي-اق الىندى.