ەلىمىز بويىنشا وتكىزىلگەن «ۇزدىك پەداگوگ-2023» رەسپۋبليكالىق بايقاۋىنىڭ قورىتىندىسى شىعارىلدى.
سالا مينسترلىگىنىڭ مالىمەتى بويىنشا، مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ ۇيىمدارىنىڭ 64 پەداگوگى ءوز ماماندىعى بويىنشا ۇزدىك اتاندى. وقۋ-اعارتۋ ءمينيسترى عاني بەيسەمبايەۆ جەڭىمپازدارعا سالتاناتتى تۇردە ماراپاتتارىن تابىستادى، دەپ حابارلايدى اlmaty-akshamy.kz.
ۆەدومستۆو باسشىسى قۇتتىقتاۋ سوزىندە مەملەكەت باسشىسىنىڭ تىكەلەي قولداۋىنىڭ ارقاسىندا ءمۇعالىم مارتەبەسى 2019 جىلى زاڭنامالىق دەڭگەيدە بەكىتىلگەننىن اتاپ ءوتتى. مۇعالىمدەرگە لايىقتى جالاقى، ۇستەمەاقىلار، زاماناۋي جۇمىس جاعدايلارى جانە كاسىبي دامۋ مۇمكىندىكتەرى قاراستىرىلعان.
«ءمۇعالىم تەك ماماندىق ەمەس، جۇرەكتىڭ تاڭداۋى، جاننىڭ قالاۋى. قاي زاماندا بولسىن اعارتۋشىلار قوعامدى ەڭ قۇندى دۇنيە - بىلىمگە جەتەلەيتىن كورنەكتى تۇلعالار سانالدى. مەنىڭشە پەداگوگتەردىڭ جانكەشتى ەڭبەگىنىڭ ءمانى وسى. جىل سايىن ءبىزدىڭ مۇعالىمدەر حالىقارالىق ارەنادا جوعارى جەتىستىكتەرگە جەتۋدە. كەشە عانا جاريالانعان PISA-2022 جاھاندىق رەيتينگىنىڭ ناتيجەلەرى دە تىكەلەي ءبىزدىڭ ۇستازدارىمىزدىڭ ەڭبەگىنىڭ جەمىسى. بۇگىن ءبىز سىزدەردىڭ اعارتۋشىلىق قىزمەتتەرىڭىزدىڭ ماڭىزدىلىعىن تاعى ءبىر رەت اتاپ ءوتۋ ءۇشىن جينالدىق. سىزدەردىڭ ەرەن ەڭبەكتەرىڭىز بەن ءوز ىستەرىڭىزگە ادالدىقتارىڭىز ءۇشىن شىن جۇرەكتەن ريزاشىلىعىمدى بىلدىرەمىن»، — دەدى عاني بەيسەمبايەۆ.
ايتا كەتەيىك، رەسپۋبليكالىق بايقاۋ جەڭىمپازدارى «ۇزدىك پەداگوگ» كۋالىگىن، «ۇزدىك پەداگوگ» توسبەلگىسىن جانە 3 450 000 تەڭگە (1000 اەك) كولەمىندە اقشالاي سىياقى الدى.
«ۇزدىك پەداگوگ» كونكۋرسى 2012 جىلدان باستاپ وتكىزىلىپ كەلەدى. وسى كۇنگە دەيىن 624 پەداگوگ ۇزدىك دەپ تانىلىپ، ولاردىڭ ءارقايسىسىنا مەملەكەتتىك قولداۋ رەتىندە 1000 ايلىق ەسەپتىك كورسەتكىش مولشەرىندە سىياقى بەرىلەدى. بيىل كونكۋرسقا قاتىسۋ ءۇشىن بارلىعى 961 ءوتىنىم بەرىلدى. كونكۋرستى وتكىزۋ ءراسىمىنىڭ ءوزى اۆتوماتتاندىرىلعان جانە اشىق تۇردە ءوتتى. رەسپۋبليكالىق كونكۋرستىق كوميسسيانىڭ قۇرامىنا ۇكىمەتتىك ەمەس ۇيىمدار، اتا-انالار قاۋىمىنىڭ وكىلدەرى، جۋرناليستەر، بەلسەندى پەداگوگتەر، ءبىلىم جانە عىلىم قىزمەتكەرلەرىنىڭ قازاقستاندىق سالالىق كاسىپوداعىنىڭ وكىلدەرى جانە ت. ب. كىردى.
