قازاقستان رەسپۋبليكاسىنىڭ ۇلتتىق ۇلانىنا قاراستى «وڭتۇستىك» وڭىرلىك قولباسشىلىعىنىڭ اسكەري بولىمدەرىندە ۇلى وتان سوعىسىنداعى جەڭىستىڭ 80 جىلدىعىنا ارنالعان «جەڭىسكە 100 كۇن قالعاندا» اكسياسى باستالدى، دەپ حابارلايدى aqshamnews.kz
ءىس-شارا جاستاردى وتانسۇيگىشتىككە تاربيەلەۋگە، ارداگەرلەردى قۇرمەتتەۋگە، ۇلى وتان سوعىسىنا قاتىسۋشىلاردىڭ باتىرلىعىن ناسيحاتتاۋعا، باتىلدىق پەن جانقيارلىقتىڭ قۇندىلىعىن، سونداي-اق وتاندى قورعاۋ بورىشىنىڭ قاسيەتتىلىگىن جانە ۇرپاقتاردىڭ تاريحي ساباقتاستىعىن تەرەڭ تۇسىنۋگە باعىتتالعان.
كەڭەس وداعىنىڭ باتىرى، گۆارديا پولكوۆنيگى باۋىرجان مومىش ۇلى اتىنداعى 5571 اسكەري ءبولىمىنىڭ اسكەري قىزمەتشىلەرى بۇل يگى باستامانى 28 گۆارديالىق-پانفيلوۆشىلار ساياباعىنداعى ماڭگىلىك الاۋعا گۇل شوقتارىن قويۋدان باستادى. ءبولىمنىڭ اسكەري وركەسترى ساياباقتاعى داڭق مەموريالى الدىندا سوعىس جىلدارىنداعى اندەر مەن مۋزىكالاردى ورىندادى.
100 كۇن بويى وتەتىن ماڭىزدى شارا اياسىندا ۇلى وتان سوعىسىنىڭ ارداگەرلەرى مەن تىل ەڭبەككەرلەرىنە قولداۋ جانە قايىرىمدىلىق كومەك كورسەتۋ اكسيالارى، اسكەري قىزمەتشىلەر مەن ۇلتتىق ۇلان ارداگەرلەرىنىڭ قاتىسۋىمەن ءبىلىم بەرۋ ۇيىمدارىنداعى ەرلىك ساباقتارى، اسكەري بولىمدەردە «اشىق ەسىك كۇندەرى»، جاستار اراسىندا پاتريوتتىق چەلەندجدەر ۇيىمداستىرىلادى. سونداي-اق ارداگەردىڭ ءۇيىنىڭ الدىندا اسكەري وركەستر سوعىس جىلدارىنداعى اندەر مەن مۋزىكالاردى ورىندايدى، قازاقستان رەسپۋبليكاسى ۇلتتىق ۇلانىنىڭ اسكەري قىزمەتشىلەرى سالتاناتتى شەرۋمەن ءوتىپ، ارداگەرگە اسكەري سالەم بەرەدى.
اكسيا «9 مامىر – ۇلى جەڭىستىڭ 80 جىلدىعى» مەرەكەسىمەن قورىتىندىلانادى.