«استانا» وڭىرلىك قولباسشىلىعىنا قاراستى 31775 اسكەري ءبولىمى اسكەري قىزمەتشىلەرىنىڭ اتا-انالارى، جۇبايلارى مەن بالالارى، باۋىرلارى مەن اپكە-قارىنداستارى ەلوردا شەتىندەگى دالالىق لاگەرگە باردى.
ۇلى وتان سوعىسىنداعى جەڭىستىڭ 80 جىلدىعىنا ارنالعان شەرۋگە ساناۋلى عانا كۇن قالدى. بۇل سوڭعى جىلدارداعى ەڭ اۋقىمدى ءىس-شارالاردىڭ ءبىرى. وعان ءتورت مىڭنان استام اسكەري قىزمەتشى قاتىسادى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
پارادتا ەڭ لايىقتى، كۇشتى ءارى ءتوزىمدى دەگەن جاۋىنگەرلەر عانا سالتاناتتى ساپ تۇزەمەك. جەڭىس شەرۋى ۇرپاقتار ساباقتاستىعىنىڭ سيمۆولىنا اينالىپ وتىر.
31775 اسكەري ءبولىمى موتواتقىشتار باتالونى كومانديرىنىڭ ورىنباسارى مايور داۋلەت قاراكەسەكوۆتىڭ زايىبى كەزدەسۋدەن العان اسەرىن جاسىرا المادى.
– جۇبايىم ءۇشىن ءمۇنداي تاريحي وقيعاعا قاتىسۋدىڭ ماڭىزدى ەكەنىن تۇسىنەمىن. اسكەري ادامعا ءاردايىم وتباسىنىڭ قولداۋى قاجەت. ءبىز ءمۇندا سول ماقساتپەن كەلىپ وتىرمىز. جولدىڭ قاشىقتىعى ەش كەدەرگى ەمەس، – دەدى ايدانا قاراكەسەكوۆا.
جاقىندارىنىڭ دالالىق لاگەرگە كەلۋى جاۋىنگەرلەر ءۇشىن توسىنسىي بولدى. ءدال وسىنداي ساتتەردە ارميانىڭ تەك اسكەري فورما مەن قاتاڭ تارتىپتەن تۇرمايتىنىن سەزىنەسىڭ.