شىمكەنت قالاسىندا كەيبىر شەنەۋنىكتەر «7-20-25» تۇرعىن ءۇي باعدارلاماسى بويىنشا باسپانا العان. بۇل تۋرالى قۇرىلىس جانە تۇرعىن ءۇي كوممۋنالدىق شارۋاشىلىق ىستەرى كوميتەتىنىڭ ءتوراعاسى الماس ىدىرىسوۆ ءمالىم ەتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا «7-20-25» تۇرعىن ءۇي باعدارلاماسىنا ءوتىنىم قابىلداۋ باستالعان كەزدە، جۇيەدەگى اقاۋدان قازاقستاندىقتار ءوتىنىمدى ۋاقىتىلى بەرە المادى. ال وسى ساتتە كەيبىر شىمكەنتتىك شەنەۋنىكتەردىڭ ءوتىنىمى كەدەرگىسىز قابىلداندى. بۇل قالاي بولعانى؟» - دەگەن ساۋال قويدى ءتىلشى.
اتالعان ساۋالعا قۇرىلىس جانە تۇرعىن ءۇي كوممۋنالدىق شارۋاشىلىق ىستەرى كوميتەتىنىڭ ءتوراعاسى الماس ىدىرىسوۆ جاۋاپ بەردى.
«بۇگىندە اتالعان فاكتىگە قاتىستى يندۋستريا جانە ينفراقۇرىلىمدىق دامۋ مينيسترلىگى شىمكەنت قالاسىنىڭ اكىمدىگىنە ساۋال جولدادى. جاعدايدى ءتۇسىندىرۋىن تالاپ ەتەمىز. وسى تۇستا ايتارىمىز، مەملەكەتتىك تۇرعىن ءۇي باعدارلاماسى ونىڭ بەكىتىلگەن ەرەجەسىنە ساي ىسكە اسۋى ءتيىس. شىمكەنت قالاسى اكىمدىگىنىڭ بەلگىلى ءبىر مەملەكەتتىك قىزمەتكەرلەر اراسىندا تۇرعىن ءۇي بايقاۋىن وتكىزىپ، «7-20-25» تۇرعىن ءۇي باعدارلاماسى اياسىندا باسپانا بەرگەنى باعدارلاما ەرەجەسىن بۇزىپ وتىر دەگەن ءسوز»، - دەدى ول.
ونىڭ ايتۋىنشا، قازىرگى ۋاقىتتا اتالعان ايماق اكىمدىگىنە شەشىمدى قايتا قاراۋ ۇسىنىلدى.
«سونىمەن قاتار، تۇرعىن ءۇي باعدارلاماسى ەرەجەسىن بۇزعانى ءۇشىن، كىنالىلەردى جاۋاپقا تارتۋ كەرەكتىگى ايتىلدى. اتالعان ماسەلە ءبىزدىڭ باقىلاۋىمىزدا. تەكسەرۋ ناتيجەسىندە مينيسترلىك تاراپىنان قابىلدانعان شەشىم تۋرالى قوسىمشا حابارلاناتىن بولادى»، - دەدى ول.