يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ جەڭىلدەتىلگەن اۆتونەسيە باعدارلاماسى ارقىلى ءۇش مىڭعا جۋىق اۆتوكولىك شىعارىلعانىن ايتتى.
مينيستر بۇل باعدارلاماعا بولىنگەن 100 ميلليارد تەڭگەدەن بولەك باسقا دا قاراجات ءبولۋ ماسەلەسى جانە اۆتونەسيەگە ءوتىنىش قابىلداۋ توقتاپ تۇرعانى جونىندە سۇراققا جاۋاپ بەردى، دەپ حابارلايدى Almaty-akshamy.kz Elorda.info-عا سىلتەمە جاساپ.
"ازىرگە وسى قاراجاتپەن شەكتەلىپ وتىرمىز. قاراستىرامىز. باعدارلاما ۇلكەن سۇرانىسقا يە. ال بانكتەر جۇمىسىن توقتاتقان شىعار، سەبەبى 20 مىڭنان استام ءوتىنىش ءتۇستى. ءبىز شامامەن 15-16 مىڭ نەسيەگە 100 ميلليارد تەڭگە جەتەدى دەپ كۇتكەن ەدىك. بۇگىندە 9885 ءوتىنىم ماقۇلداندى، شامامەن 10 مىڭ. بۇل شامامەن 73 ميلليراد تەڭگە. ازىرگە رەزەرۆتە 27 ميلليارد تەڭگە بار. ءۇش مىڭعا جۋىق اۆتوكولىك شىعارىلدى"، – دەدى مينيستر.
ونىڭ ايتۋىنشا، بىرنەشە ايدان كەيىن قايتارىلعان قاراجات جاڭا نەسيەلەرگە جۇمسالادى.
بۇعان دەيىن بانكتەر جەڭىلدەتىلگەن باعدارلاما بويىنشا كولىك ساتىپ الۋعا ءوتىنىش قابىلداۋدى توقتاتقانى حابارلانعان بولاتىن.