جەنيەۆا كونسەرۆاتورياسىنىڭ كونسەرت زالىندا «تۇران» ەتنو-فولكلورلىق ءانسامبلىنىڭ، تەنور مەدەت شوتابايەۆتىڭ جانە «روزا باعلانوۆا اتىنداعى قازاقكونسەرت» ۇيىمى مۋزىكانتتارىنىڭ «Bridge of Times» كونسەرتى ءوتتى.
جەنيەۆادا ورنالاسقان بۇۇ بولىمشەسى جانىنداعى قازاقستاننىڭ تۇراقتى وكىلدىگى بۇل جوبانى «قازاقكونسەرت» ونەرپازدارىمەن بىرلەسىپ، ولاردىڭ الەمدىك تۋرنەسى اياسىندا جەنيەۆالىق La Haute École de musique de Genève، le Centre d'Accueil de la Genève Internationale (CAGI) جانە les Ateliers d'ethnomusicologie (ADEM) قولداۋىمەن جۇزەگە اسىردى. بۇل جەرگىلىكتى اۋديتورياعا باعىتتالعان سوڭعى ۋاقىتتاعى ەڭ ءىرى مادەني ءىس-شارا بولدى، دەپ حابارلايدى Almaty-akshamy.kz Elorda.info-عا سىلتەمە جاساپ.
«تۇران» ەتنو-فولكلورلىق ءانسامبلى قازاق حالقىنىڭ وزىندىك مۋزىكالىق ونەرىن، كونە اسپاپتاردىڭ دىبىسىن جانە كومەي ءان ونەرىن جاڭعىرتۋعا ۇمتىلىپ كەلەدى. قوبىز، جەتىگەن، شەرتەر، ورتەكە، سىبىزعى جانە تاعى باسقا 30-دان استام ۇلتتىق مۋزىكالىق اسپاپتا ونەر كورسەتكەن قازاقستاندىقتاردى كورەرمەن جىلى قارسى الدى.
سونىمەن قاتار اۋديتوريا حالىقارالىق بايقاۋلاردىڭ لاۋرەاتى، قازاقستاننىڭ ەڭبەك سىڭىرگەن قايراتكەرى، تەنور مەدەت شوتابايەۆتى ىستىق ىقىلاسپەن قابىلدادى.
ۇلتتىق جانە كلاسسيكالىق مۋزىكا اسپاپتارى ءۇشىن جازىلعان جانە قازاقستاننىڭ ەڭبەك سىڭىرگەن قايراتكەرى، كومپوزيتور اقتوتى رايىمقۇلوۆامەن بىرگە ورىندالعان كومپوزيسيالاردىڭ ورىندالۋى كەشتىڭ شارىقتاۋ شەگىنە اينالدى.
انشلاگپەن وتكەن كونسەرتتىڭ سوڭىندا قوناقتارعا ۇلتتىق تاعامدار ۇسىنىلدى.