كەڭەس اسكەرلەرىنىڭ اۋعان دالاسىنان شىعارىلعانىنا – 34 جىل
الماتىداعى 28 پانفيلوۆشىلار ساياباعىندا 15 اقپان – كەڭەس اسكەرلەرىنىڭ اۋعان دالاسىنان شىعارىلعانىنا 34 جىل تولۋىنا ارنالعان سالتاناتتى جيىن ءوتتى. سالتاناتتى جيىنعا ۇلى وتان سوعىسىنىڭ ارداگەرلەرى، اۋعان سوعىسىنىڭ ارداگەرلەرى، قالالىق ارداگەرلەر كەڭەسىنىڭ مۇشەلەرى مەن قالا جۇرتشىلىعى قاتىستى.
سالتاناتتى جيىن اۋعان سوعىسىندا ەرلىكپەن قازا تاپقان بوزداقتاردى ءبىر ءسات ءۇنسىز ەسكە الۋمەن باستالدى. العاشقى ءسوز كەزەگىن الماتى وڭىرلىك گورنيزون باسشىسىنىڭ ورىنباسارى، پولكوۆنيك اسقار احمەتبەكوۆ الدى.
– 1979 جىلدىڭ 25 جەلتوقسانىندا باستالىپ، 1989 جىلدىڭ 15 اقپانىنا دەيىن سوزىلعان سوعىسقا كسرو اۋماعىنان 620 مىڭنان استام جاۋىنگەر مەن وفيسەر قاتىسقان ەدى. وسى سوعىستا كەڭەس وداعىنان 15 مىڭ 51 ادام وققا ۇشتى. قازاقستاننان بارعان 22 مىڭ 269 جاۋىنگەردىڭ 924ء-ى سوعىس دالاسىندا ەرلىكپەن قازا تاپتى. ەلگە 1015 جاپ-جاس بوزبالا كەمتار بولىپ ورالدى. سوعىس دالاسىندا 21 سولدات ءىز-تۇزسىز كەتتى. وسىناۋ 110 ايعا سوزىلعان سوعىستان ەلگە امان-ەسەن ورالعان جاۋىنگەرلەردىڭ كوڭىلدەرى جارالى. ولار ۇنەمى مايداندا وققا ۇشقان جولداستارىن ويلايدى. ولاردىڭ ەسىمدەرى جادىمىزدا ساقتاۋلى. ولاردىڭ جاساعان ەرلىكتەرى ەلدىڭ ەسىندە، – دەدى ول.
قالالىق اكىمشىلىك اتىنان ءسوز العان باۋىرجان جاۋباسوۆ اۋعان سوعىسىنا قاتىسقان جاۋىنگەرلەردىڭ كورسەتكەن جانقيارلىق ەرلىكتەرى جاس ۇرپاققا قاشاندا ۇلگى بولاتىنىنا توقتالدى. ول جاستاردى وتانسۇيگىشتىك رۋحتا تاربيەلەۋگە قوسىپ وتىرعان ۇلەستەرى ءۇشىن ريزاشىلىعىن ءبىلدىردى.
قالالىق ارداگەرلەر كەڭەسىنىڭ ءتوراعاسى اقان بيجانوۆ، اۋعان سوعىسىنا قاتىسقان جاۋىنگەرلەر جاستارعا تاربيە بەرىپ، مەملەكەتىمىزدىڭ تۇراقتىلىعى جولىندا ەڭبەك ەتىپ جاتقانى جونىندە باياندادى. اۋعان سوعىسى ارداگەرلەرى مەن مۇگەدەكتەرى كەڭەسى ءتوراعاسىنىڭ ورىنباسارى بايكال حامزين مۇنداي ءىس-شارانىڭ جاستارعا بەرەتىن ۇلگىسى تۋرالى ايتىپ، سوعىستا قازا تاپقاندارعا كورسەتىلگەن قۇرمەتتىڭ ەرلىككە كورسەتىلگەن قۇرمەت ەكەنىن جەتكىزدى. سالتاناتتى جيىن بارىسىندا ارداگەرلەر ءسوز الىپ، ەلىمىزدەگى بەيبىت ءومىردىڭ باياندى بولۋىن تىلەدى.
سالتاناتتى جيىن سوڭىندا ماڭگىلىك الاۋ مەن اۋعان سوعىسىنا قاتىسۋشىلارعا ارنالعان ەسكەرتكىشكە گۇل شوقتارى قويىلدى. جينالعاندار «اسكەرلەر ۇيىندە» وتكەن كونسەرتتىك باعدارلامانى تاماشالادى.