جەلتوقسان وقيعاسى – تاۋەلسىزدىكتىڭ التىن تۇعىرى. اتا-بابالار اڭساعان ازاتتىقتىڭ شىراعى جاعىلعان ءسات. وسىناۋ تاريحي وقيعانىڭ كۋاگەرلەرى – المالى اۋدانى «جەلتوقسان اقيقاتى» پاتريوتتىق قوزعالىسىنىڭ ءتورايىمى گۇلميرا شانيگبايەۆا مەن ورىنباسارى عاني قالماقبايەۆ قازۇقپۋ قۇرامىنداعى كاسىبي ءبىلىم بەرۋ كوللەدجى ستۋدەنتتەرىمەن كەزدەستى.
ولار «جەلتوقساننىڭ مۇزعا جانعان الاۋى...» تاقىرىبىندا وتكەن تاربيە ساعاتىندا جاستارعا تاعلىمدى اڭگىمەلەر ايتتى. ءيا، سوناۋ 1986 جىلعى جەلتوقسان وقيعاسى ەل جادىندا ءالى كۇنگە جاڭعىرىپ تۇر. كەڭەستىك جۇيەگە قارسى تۇرعان جەلتوقسان كوتەرىلىسىندەگى قازاق جاستارىنىڭ وتانسۇيگىشتىك سەزىمىن كەيىنگى ۇرپاققا ناسيحاتتاي وتىرىپ، سول كەزدەگى قۇربانداردى ماڭگى ەستە ساقتاۋ، تاۋەلسىزدىك باستاۋى ىزعارلى جەلتوقسان وقيعاسى ەكەنىن جەتە ءتۇسىندىرۋ، سول ارقىلى جاس ۇرپاق بويىنا ەلىنە، جەرىنە، ۇلتىنا دەگەن پاتريوتتىق سەزىمنىڭ ءدانىن سەبۋ.
اتالعان ءىس-شارادا الدىمەن ەلىمىزدىڭ گيمنى ورىندالدى. جەلتوقسانشى عاني ءمۇتالىپ ۇلى – سول كەزدەگى الپاۋىت ەلدىڭ ايبارىنان سەسكەنبەي، ءوز ەلىنىڭ نامىسىن قورعاپ، بويىندا ۇلتتىق رۋحى اسپانداعان قازاقتىڭ ورىمدەي قىز-جىگىتتەرىمەن بىرگە ورتالىق الاڭعا شىققان ازامات. «قانشا جىل وتسە دە جەلتوقسان جۇرەكتە جازىلماعان جارا، تاريحتا قاسىرەتتى كۇن بولىپ قالعانى راس. ءبىراق وسى وقيعانىڭ قالاي بولعانى تۋرالى وسكەلەڭ ۇرپاق ءبىلۋى كەرەك. ويتكەنى وسى وقيعاعا بىرەۋدىڭ اكەسى، اناسى، بىرەۋدىڭ بالاسى قاتىستى. قازاق جاستارى سول ساتتە كوشەگە شىعىپ، ءۇن قاتتى. ەل تاۋەلسىزدىگىن تالاپ ەتتى. ەلمەن ساناسپاي ىستەلگەن ىسكە، شىعارعان شەشىمگە حالىق نارازى ەكەندىكتەرىن كورسەتتى. بۇل تاريحتاعى تاعى ءبىر ساباق بولدى. سوندىقتان بۇل قازاق حالقىنىڭ ويى، مۇڭى بولىپ باستالدى دا ارتى ۇلكەن وزگەرىسكە اكەلگەن بولاتىن»، – دەدى ول.
سونىمەن قاتار، گۇلميرا بەلعوجا قىزى ءوز ويىن جەتكىزدى. «ءبىرىمىز بۇل كۇندى تاۋەلسىزدىك مەرەكەسى دەسەك، ەكىنشىمىز تاۋەلسىزدىككە قول جەتكىزۋگە قادام جاساعان قارالى كۇندەردىڭ ءبىرى دەيمىن...
شىنىن ايتۋ كەرەك، جەلتوقسان ءبىر جاعىنان قارالى كۇن. قانشاما جالىندى جاستىڭ ءومىرى قيىلدى. مەرەكە دەپ تە ايتا المايمىن، ءبىراق تاۋەلسىزدىك باستاۋى دەگەندى قولدايمىن. ءبىراق بۇل كۇنى وسىنداي تاربيەلىك ماڭىزى بار كەزدەسۋلەر، تاريحي ساتكە نەگىزدەلگەن كينولار قويىپ، پاتريوتتىق اندەر ورىندالعانى دۇرىس. ءار زاماننىڭ جاستارى سول ۋاقىتتىڭ تالابىنا ساي تاربيەلەنەدى. دەسەك تە، جاستاردان ۇلكەن ءۇمىت كۇتەمىز. بۇگىنگى جاستار قازاقتىڭ باستى بايلىعى تاۋەلسىزدىك ەكەنىن شىنايى سەزىنسە، بابالار مۇراتىنىڭ ورىندالعانى بولار ەدى»، – دەدى ول.
بۇل ءىس-شارادا پاتريوتتىق اندەر ايتىلىپ، ولەڭدەر وقىلدى. قازاق ەلىنىڭ وتكەنى مەن بۇگىنىن بەينەلەيتىن بەينەروليكتەر كورسەتىلىپ، ۇستازدار قاۋىمى مەن كوللەدج ديرەكتورى ا.قارابايەۆا جەلتوقسان وقيعاسىنىڭ ماڭىزى تۋرالى ايتىپ، ءوز پىكىرلەرىن ءبىلدىردى، جاستاردى ەلىم دەگەن ەل ازاماتتارىن قۇرمەتتەۋگە شاقىردى. ءىس-شارا سوڭىندا ءا.تىنالييەۆتىڭ «جەلتوقسان جەلى» ءانىن قىزدار حورمەن ورىندادى.
توپ جەتەكشىسى نۇرگۇل ابدرامان قىزى جەلتوقساندىق جاستار ۇمىتىلماي، ەرلىكتەرى ەستە ماڭگىلىك ساقتالاتىندىعىن ايتىپ، مەيماندارعا العىس ءبىلدىردى.