نەپالدا الەۋمەتتىك جەلىلەردى بۇعاتتاۋ جاپپاي قارسىلىققا ۇلاسىپ، قاقتىعىستار كەزىندە كەمى 22 ادام قازا تاۋىپ، مىڭنان اسا ادام جارالاندى دەگەن دەرەك تارادى. بيلىك بۇعاتتاۋ ارەكەتتەرىن توقتاتتى جانە پرەمەر-مينيستر شارما ولي وتستاۆكاعا ءوتىنىش بەردى. دەگەنمەن نارازىلىقتار كومەندانت ساعاتقا قاراماستان جالعاسىپ جاتىر. بۇل تۋرالى رەۋتەر اگەنتتىگى حابارلادى. ءدال ءقازىر نەپالدا نە بولىپ جاتىر اqshamnews.kz ءتىلشىسىنىڭ حرونولوگيالىق ماتەريالىنان ءبىلىڭىز.
ءبارى نەدەن باستالدى؟
ۇكىمەت Facebook، Instagram، YouTube، X (Twitter)، WhatsApp، Reddit، LinkedIn سەكىلدى پلاتفورمالاردى "تىركەۋ تالاپتارىن ورىندامادى" دەپ شەكتەپ تاستادى. بۇل شەشىمدى حالىق ءسوز بوستاندىعىن شەكتەۋ رەتىندە قابىلداپ، جاستار كوشەگە نارازىلىققا شىقتى.
سۋرەت: Adnan Abidi / Reuters
8 قىركۇيەكتە قاقتىعىستار ۋشىعىپ، العاشقى قۇرباندار تىركەلدى
نارازىلىق بىلدىرۋشىلەر شەرۋگە "Z ۇرپاعى نارازىلىقتارى" دەپ اتاۋ بەرىپ، ەلدە جاپپاي تارتىپسىزدىكتەر باستالدى. بۇنداي اتاۋ كوپشىلىگىنىڭ جاسىنا بايلانىستى قويىلعان. اشۋلى توپ ءتىپتى قارجى ءمينيسترىن شەشىندىرىپ، وزەننەن جالاڭاش وتكىزگەن. ونىمەن قوسا ۇكىمەتىنىڭ كەڭسەسى ورنالاسقان 100 جىلدان اسا تاريحى بار كاتماندۋ قالاسىنداعى سينگحا دۋربار سارايىن ورتەپ جىبەردى.
كاتماندۋ مەن وزگە قالالاردا پوليسيا پارلامەنتكە باسىپ كىرۋگە تالپىنعان توپتى كوز جاسارتاتىن گازبەن جانە رەزەڭكە وقپەن تاراتتى. نارازىلار پارلامەنت الدىنداعى قورشاۋلاردى بۇزىپ، بىرنەشە ساياساتكەردىڭ رەزيدەنسياسىنا وت قويدى. سول كۇنى قازا تاپقاندار تۋرالى العاشقى اقپاراتتار شىقتى. ناتيجەسىندە ەكى كۇن ىشىندە جاپپاي تارتىپسىزدىكتەن 22 ادام قازا تاۋىپ، 400-دەن استام ادام جارالاندى.
سۋرەت: Reuters
بيلىك شەگىندى، پرەمەر وتستاۆكاعا كەتتى
بايلانىس جانە سيفرلىق تەحنولوگيالار ءمينيسترى "الەۋمەتتىك جەلىلەردى بۇعاتتاۋدى توقتاتتىق، ولار جۇمىس ىستەپ تۇر" دەپ حابارلادى. سول كۇنى پرەمەر-مينيستر شارما ولي قىزمەتىنەن كەتۋگە ءوتىنىش بەردى. ءبىراق بۇل شەشىم دە تولقۋدى باسا المادى. شەرۋشىلەر جۇيەلىك رەفورمالاردى جانە بيلىكتىڭ ەسەپ بەرۋىن تالاپ ەتىپ جاتىر.
قازىرگى احۋال قانداي؟
كاتماندۋدا كوممەندانت ساعاتى ەنگىزىلدى. سوعان قاراماستان، جاستاردىڭ باستاماسىمەن وتكەن ميتينگىلەر تولاستاماي تۇر: پارلامەنت پەن شەنەۋنىكتەر رەزيدەنسيالارى ماڭىندا ۇراندار ايتىلىپ، قاۋىپسىزدىك شارالارى كۇشەيتىلدى. بيلىك پەن نارازىلىق وكىلدەرى ديالوگقا كەلمەيىنشە، احۋالدىڭ تۇراقتالۋى ەكىتالاي دەگەن بولجام ايتىلىپ جاتىر.
سۋرەت: Reuters