جەلىدە شىمكەنتتەگى بىرنەشە مەكتەپكە "شابۋىل جاسالادى" دەگەن جالعان اقپارات تارادى، - دەپ حابارلايدى aqshamnews.kz ءتىلشىسى.
16 قاڭتاردا Telegram-ارنالار مەن توپتاردا بەلگىسىز ادامدار قالاداعى شامامەن 25 مەكتەپ، گيمنازيا جانە ليسەيدىڭ اتاۋىن اتاپ، "سول جەرلەرگە بارامىز" دەپ قورقىتقان جازبالار جاريالاعان. ەموسياعا تولى بۇل حابارلامالار اتا-انالار مەن مۇعالىمدەر اراسىندا ۇرەي تۋعىزدى.
الايدا قالالىق ءبىلىم باسقارماسى بۇل اقپاراتتىڭ جالعان ەكەنىن مالىمدەدى. ۆەدومستۆو وكىلدەرىنىڭ ايتۋىنشا، “بالانىڭ ومىرىنە ءقاۋىپ ءتونىپ تۇر” دەگەن حابارلامالار شىندىققا جاناسپايدى، قازىرگى تاڭدا ءقاۋىپ توندىرەتىن ەشقانداي وقيعا تىركەلمەگەن.
باسقارما مالىمەتىنشە، جاعداي جاۋاپتى قىزمەتتەردىڭ باقىلاۋىندا. جالعان اقپارات جاريالاعان اككاۋنتتار انىقتالىپ، تەكسەرۋ جۇرگىزىلىپ جاتىر. سونىمەن بىرگە تۇرعىندارعا راستالماعان، ەموسياعا نەگىزدەلگەن مالىمەتتىڭ قوعامدا ورىنسىز ۇرەي تۋعىزاتىنىن ەسكەرتىپ، تەك رەسمي دەرەككوزدەرگە سۇيەنۋگە جانە تەكسەرىلمەگەن اقپاراتتى تاراتپاۋعا شاقىردى.
قالالىق پوليسيا دەپارتامەنتى دە مەسسەندجەرلەردە تاراعان “مەكتەپتەردە جاپپاي قىلمىس بولادى” دەگەن حابارلامالاردىڭ فەيك ەكەنىن راستادى. قۇقىق قورعاۋ ورگاندارى تەكسەرۋ شارالارىن باستاپ، قاۋىپسىزدىك رەجيمىن كۇشەيتكەنىن، جاعداي تولىق باقىلاۋدا ەكەنىن حابارلادى.
سونداي-اق پوليسەيلەر قاساقانا جالعان اقپارات تاراتۋ زاڭ بويىنشا قىلمىس ەكەنىن ەسكە سالدى: مۇنداي ارەكەت ءۇشىن 5 جىلعا دەيىن باس بوستاندىعىنان ايىرۋ جازاسى قاراستىرىلعان. رەسمي ورگاندار تۇرعىنداردى سابىر ساقتاپ، تەك سەنىمدى اقپارات كوزدەرىنە عانا سەنۋگە ۇندەدى.