الەۋمەتتىك جەلىلەردە كەڭەستىك «پراۆدا» گازەتىنىڭ 1951 جىلعى 1 ناۋرىزداعى ساندارىنىڭ ءبىرىنىڭ فەيك سۋرەتى تاراۋدا، دەپ حابارلايدى almaty-akshamy.kz stopfake.kz سىلتەمە جاساپ.
ءبىرىنشى بەتتە «اقش دوللارى بوس، قامتاماسىز ەتىلمەگەن قاعاز» دەگەن ماقالا جاريالانعان. ماقالادا دوللار قۇنسىز، ال اقش ەكونوميكاسى «شىن مانىندە تۇككە تۇرعىسىز نارسە»، سونداي-اق اقش-تىڭ جىو-نەن جوعارى مولشەردە سىرتقى قارىزى بار جانە ول قارىزعا ءومىر ءسۇرىپ جاتىر دەلىنگەن. «ەڭ ءىرى بورىشكەرلەر» «ەكونوميكاسى مىقتى، تۇراقتى دامىعان مەملەكەتتەر» ەكەن، مىسالى، جىو-دەن ءتورت ەسە ارتىق قارىزى بار ۇلىبريتانيا. شىن مانىندە، مۇنداي ماقالا شىقپاعان.
«پراۆدا گازەتى 1951 1 ناۋرىز» دەپ ىزدەگەندە ءبىرىنشى بەتتە شىققان ەكى ماقالا تابىلدى. ولاردىڭ بىرىندە اقش جانە «بوس دوللار» تۋرالى ماقالا باسىلعان (الەۋمەتتىك جەلىلەردەگى سۋرەتتە كورسەتىلگەندەي). ال سول باسىلىمنىڭ 1951 جىلعى 1 ناۋرىزداعى تاعى ءبىر سۋرەتىندە «بولشەك ساۋدا باعاسى تاعى دا تومەندەدى» دەگەن تاقىرىپپەن شىققان مۇلدەم باسقا جاريالانىم جارىق كورگەن.
ايتا كەتەيىك، ەكى سۋرەتتىڭ دە وڭ جاعىندا باسقا تاقىرىپتىڭ باسى كورىنىپ تۇر – ءبىرىنشى جولدا «بولشەك…» جانە ەكىنشى جولدا «باعا» دەگەن ارىپتەر جازىلعان. ياعني، بۇل ەكى بولەك شىققان گازەت ەمەس. الايدا، ولاردىڭ ءبىرى – ءتۇپنۇسقا، ەكىنشىسى – وڭدەلگەن. ونى تاقىرىپتارى ءارتۇرلى ەكى سۋرەتتەگى داقتاردىڭ جانە قارىنداشپەن جازىلعان جازۋلاردىڭ بىردەي بوۋلىمەن راستالادى.
بولشەك ساۋدا باعاسىنىڭ تومەندەۋى تۋرالى تاقىرىبى بار گازەت تولىق ۇسىنىلعان. ياعني، گازەت بەتىن اشىپ، باسىلعان باسقا ماتەريالداردى دا وقۋعا بولادى. باسقا ماقالالاردىڭ تاقىرىبى دا باعانىڭ تومەندەۋىمەن بايلانىستى.
گازەتتىڭ اتاۋى، تاقىرىبى جانە ءماتىننىڭ ءبىر بولىگىنەن باسقا دا جازۋلار كورىنەتىن اقش تۋرالى تاقىرىبى بار باسقا سۋرەتتەر تابىلعان جوق. بۇل گازەتتىڭ وسى نۇسقاسى جالعان ەكەندىگىن بىلدىرەدى.
فاكچەكەرلەر «اقش دوللارى – بوس، قامتاماسىز ەتىلمەگەن قاعازدار» دەگەن تاقىرىبى بار سۋرەتتىڭ ءتۇپنۇسقالىعىن تەكسەرىپ، گازەتتىڭ بۇل سانىن باسقالارمەن سالىستىرىپ، ءبىرقاتار سايكەسسىزدىكتى انىقتاعان.
ولاردىڭ ءبىرى – دوللار تۋرالى ماتەريال تولىقتاي (تاقىرىبى مەن نەگىزگى ءماتىنى) قالىڭ قارىپپەن تەرىلگەن، بۇل «پراۆدا» گازەتىنە ءتان ەمەس.
سونداي-اق ماقالا ءماتىنىنىڭ رەڭكى باسقا بەلگىلەردەن، مىسالى، گازەت اتاۋىنان («پراۆدا» سوزىنەن) ەرەكشەلەنەدى. سۋرەتتە ۋاقىت وتە كەلە بارلىق ارىپتەردىڭ بوياۋى كەتىپ، اق داقتاردىڭ پايدا بولعانىن بايقاۋعا بولادى. الايدا، امەريكا تۋرالى ماقالادا ولاي ەمەس.
«پروۆەرەنو.مەديانىڭ» حابارلاۋىنشا، ماقالانىڭ مازمۇنىنا قاتىستى دا ەسكەرتۋلەر بار. 50ء-شى جىلدارى «ءجىو» تەرمينى ورىس تىلىندە سيرەك قولدانىلعان. سونداي-اق ءارتۇرلى ەلدەردىڭ سىرتقى قارىزدارى تۋرالى مالىمەتتەر بارشاعا قول جەتىمدى بولماعان.
دەمەك، جەلىدە تاراعان سۋرەت – فەيك. ناقتى سۋرەت وڭدەلگەن، ال ءبىرىنشى بەتتەگى ءماتىن اۋىستىرىلعان. سونىمەن قاتار «پراۆدا» گازەتىندە «بوس اقش دوللارى» تۋرالى ماقالالار جاريالانباعان.