پرەمەر-مينيستر ءاليحان سمايىلوۆ جامبىل وبلىسىنا جۇمىس ساپارى بارىسىندا «ەۆروحيم-قاراتاۋ» ج ش س ءىرى حيميالىق كەشەنىنىڭ قۇرىلىس جوباسىمەن جانە «تاراز حيميالىق پاركى» اەا بازاسىنداعى جاڭا ينۆەستيسيالىق جوبالارمەن تانىستى، دەپ حابارلايدى almaty-akshamy.kz ۇكىمەتتىڭ باسپا ءسوز قىزمەتىنە سىلتەمە جاساپ.
بۇگىندە ءوڭىردىڭ ونەركاسىپ سالاسىندا 838 كاسىپورىن جۇمىس ىستەيدى، ال جۇمىسپەن قامتىلعاندار سانى – 43 مىڭ ادام. بيىلعى 7 ايدىڭ قورىتىندىسىنا سايكەس وبلىستا وندىرىلگەن ءونىم كولەمى 510 ملرد تەڭگەگە (+7،8%) جەتتى.
«ەۆروحيم» كومپانياسى اۋقىمدى ينۆەستيسيالىق جوبانىڭ ءبىرىنشى كەزەڭىن جۇزەگە اسىردى: تاۋ-كەن كەشەنىنىڭ بازاسىندا جىلىنا 660 مىڭ تونناعا دەيىن فوسفوريتتەر ءوندىرۋ جولعا قويىلدى. قۋاتتىلىعى جىلىنا 640 مىڭ توننا ورتاشا ۇساقتاۋ جانە ۇساق ۇنتاقتاۋ قوندىرعىسى سالىندى. ينۆەستيسيا كولەمى – $126 ملن.
ەكىنشى كەزەڭ شەڭبەرىندە مينەرالدى تىڭايتقىشتار شىعاراتىن حيميا كەشەنىنىڭ قۇرىلىسى باستالدى. وندىرىستىك قۋاتتىلىعى جىلىنا كەمىندە 1 ملن تونناعا جەتەدى. ەكىنشى كەزەڭدى جۇزەگە اسىرۋ $1 ملرد-تان استام تىكەلەي شەتەلدىك ينۆەستيسيا تارتۋعا جانە 1 200 جاڭا جۇمىس ورنىن اشۋعا مۇمكىندىك بەرەدى.
پرەمەر-مينيستر ۇكىمەتتىڭ حيميا ونەركاسىبىندەگى جوبالاردى جۇزەگە اسىرۋعا ۇلكەن كوڭىل ءبولىپ وتىرعانىن، سوندىقتان جاڭا ءىرى زاۋىتتىڭ ءوڭىردىڭ عانا ەمەس، جالپى رەسپۋبليكانىڭ دامۋى ءۇشىن دە ماڭىزى زور ەكەنىن باسا ايتتى.
«بۇل جوبانى ىسكە قوسۋ اۋىل شارۋاشىلىعى سالاسىنىڭ قاجەتتى مينەرالدى تىڭايتقىشتارعا دەگەن سۇرانىسىن ءتيىستى دەڭگەيدە قامتاماسىز ەتەدى جانە قوسىمشا جۇمىس ورىندارىن اشۋعا مۇمكىندىك بەرەدى. سوندىقتان ىشكى جانە سىرتقى نارىقتا سۇرانىسقا يە ءونىمدى تەزىرەك شىعارۋ ءۇشىن زاۋىتتى ۋاقتىلى ىسكە قوسۋدىڭ ماڭىزى زور»، – دەدى ءاليحان سمايىلوۆ.
ءارى قاراي ءاليحان سمايىلوۆ شۋ اۋدانىندا ورنالاسقان «تاراز حيميالىق پاركى» ارنايى ەكونوميكالىق ايماعىنىڭ قىزمەتىمەن تانىستى. سونىمەن قاتار پرەمەر-مينيسترگە «TAS Market» جشس-نىڭ ونەركاسىپتىك كرەمنيي، گرافيت ەلەكترودتارى، پوليكرەمنيي جانە كۇن باتارەيالارى ءوندىرىسى جولعا قويىلعان كرەمنيي كلاستەرىن قۇرۋ جونىندەگى ينۆەستيسيالىق جوباسى تانىستىرىلدى. سونداي-اق «Qazaq Soda» ج ش س جۇزەگە اسىرىپ جاتقان ەلىمىزدەگى كالسييلەندىرىلگەن سودا شىعاراتىن العاشقى زاۋىت قۇرىلىسىنىڭ جوباسى تانىستىرىلدى.
«ءبىز بۇل جوبالاردى قولدايمىز جانە جەتىسپەيتىن ينفراقۇرىلىمدى تارتۋ بويىنشا جۇمىستاردى جالعاستىراتىن بولامىز. مۇنى ءبىر جىل ىشىندە ىسكە اسىرۋعا بولادى. يندۋستريا مينيسترلىگى مەن قتج-عا ءتيىستى تاپسىرما بەرەمىن»، – دەپ تۇيىندەدى ءسوزىن ءاليحان سمايىلوۆ.