جەلدەي جۇيرىك جۋرناليست

ەرەنعايىپ قۋاتاي ۇلى ەندى پراگا جارتى مارافونىنا قاتىسادى.

بىلتىر اقش-تىڭ نيۋ-يورك قالاسىندا العاش بولىپ وتانداستارىمىزدىڭ اراسىندا التى مەيجور مارافوندى 3 ساعات ىشىندە جۇگىرگەن ەرەنعايىپ قۋاتاي ۇلى پورتۋگاليانىڭ ليسسابون قالاسىندا ءوتىپ جاتقان Lisbon half marathon-2024 مارافونىنا قاتىسىپ جاتىر، دەپ حابارلايدى Almaty-akshamy.kz

ول مارافوندا جۇگىرىپ، مارەگە 1 ساعات 21 مينۋت 53 سەكۋندتتا جەتتى. ءوزىنىڭ ايتۋىنشا، ناتيجە جامان ەمەس.

«كەشە مەن التى جارتىنى باستادىم. ناتيجە جامان ەمەس: 1:21:53. Lisbon half marathon تولىق مارافوننان كەم بولعان جوق. الەمنىڭ ءار جەرىنەن 37 500 ادام قاتىسقان سۇراپىل جارىس بولدى. ايتپاقشى، جارتى مارافوننىڭ الەمدىك رەكوردى وسى ليسسابون جارتى مارافونىنىڭ ەنشىسىندە. ەكى جىل بۇرىن ۋگاندالىق جەلاياق كيپليمو دجەيكوب 57:31 ناتيجەسىمەن تالايدىڭ تاڭدايىن قاقتىرعان بولاتىن. بيىل ليسسابوندا كۇن ىستىق بولدى. سوعان بايلانىستى بولعان شىعار، الەم رەكوردى جاڭارماق تۇگىلى، وعان باقانداي 3 مينۋت جەتپەي قالدى.قالاي بولعاندا دا ۇيىمداستىرۋ دەڭگەيى مەيجور مارافوننان ەش كەم بولعان جوق. تەك پۋبليكانىڭ اعىلشىندار سياقتى اگرەسسيۆتى قولداۋى جەتىسپەي قالعان سياقتى. سونىمەن، Superhalfs-تىڭ العاشقى مەدالى قالتادا. الدا ساۋىردە پراگا كۇتىپ تۇر. مارافون تەك دالاقتاپ جۇگىرۋ ەمەس، ونىڭ دا فيلوسوفيالىق ءمانى بار. مارافون – جىگەر. مارافون – ءتارتىپ. مارافون – قايىرىمدىلىق. مارافون – ساياحات»، – دەپ جازدى ول ءوزىنىڭ فب پاراقشاسىندا.