حالىقتىڭ كوبى ماشاقاتىنان قاشىپ، قۇجاتىن اۋىستىرعىسى كەلمەيدى.
ازاماتتاردىڭ تۋۋ تۋرالى كۋالىگىندە ءاتى-جونى دۇرىس جازىلماعاندىقتان، بارلىق قۇجاتىندا قاتە بولادى، ءقازىر مۇنىڭ ءبارىن تۇزەتۋگە مۇمكىندىك بار، دەپ حابارلايدى Almaty-akshamy.kz
نەدەن باستاۋ كەرەك؟
الدىمەن تۋۋ تۋرالى كۋالىكتى تۇزەتۋ كەرەك.
بارلىق جەكە قۇجات تۋۋ تۋرالى كۋالىكتىڭ نەگىزىندە بەرىلەدى. سوندىقتان الدىمەن سونى تۇزەتىپ الۋ كەرەك. بۇگىندە بۇل ءراسىم بارىنشا جەڭىلدەتىلگەن.
«تۋۋ تۋرالى كۋالىككە تۇزەتۋ ەنگىزۋ ءۇشىن نەمەسە جەكە مالىمەتتى اۋىستىرۋ ءۇشىن، ەلەكتروندى ۇكىمەت پورتالى ارقىلى ءوتىنىش جىبەرۋگە بولادى. حالىققا قىزمەت كورسەتۋ ورتالىعى دا ءوتىنىش قابىلدايدى. سوسىن تۇرعىلىقتى جەرى بويىنشا ازاماتتىق حال اكتىلەرىن تىركەۋ بولىمىنە بارىپ، بارلىق قۇجاتتى تاپسىرۋ قاجەت»، - دەيدى ماماندار.
وتىنىشپەن بىرگە قاتە جازىلعان قۇجاتتار دا تاپسىرىلادى. سونداي-اق 0،5 ايلىق ەسەپتىك كورسەتكىش (1 750 تەڭگە) كولەمىندە مەملەكەتتىك باج سالىعىن تولەۋ كەرەك. بارلىعى دۇرىس بولسا، جاڭادان تۋۋ تۋرالى كۋالىك بەرىلەدى.
18 جاسقا دەيىنگى بالانىڭ قۇجاتىندا قاتە بولسا، ءوتىنىشتى اتا-اناسى، اسىراپ الۋشىلار نەمەسە قامقورشىلار بەرۋى ءتيىس.
كۋالىكتەن «وۆ-ەۆ»-تەر قالاي الىنادى؟
قازاقستاندا 1996 جىلى كۋالىكتەگى ادامنىڭ ءاتى-جونى، تەگى مەن اكەسىنىڭ اتىن قازاقشا جازۋعا رۇقسات بەرىلدى. سول كەزدە قابىلدانعان جارلىققا سايكەس، ۇلتى قازاق ازاماتتار تەگi مەن اكەسiنiڭ اتىنداعى قازاق تiلiنە ءتان ەمەس اففيكستi الىپ تاستاۋعا قۇقىلى. الايدا تەگi مەن اكەسiنiڭ اتىنىڭ ءتۇبiرلiك نەگiزi ساقتالۋعا تيiس. وسىلايشا، «وۆ-ەۆ» سياقتى ورىسشا جۇرناقتى الىپ تاستاپ، اكەسiنiڭ اتىن جازعان كەزدە ازاماتتىڭ جىنىسىنا قاراي «ۇلى» نەمەسە «قىزى» سوزدەرىن قوسىپ جىبەرۋگە بولادى.
E-gov پورتالىندا كورسەتىلگەن مالىمەتكە سايكەس، تەكتى قازاقشا جازۋ ءراسىمى وزگەرتۋ، تولىقتىرۋ نەمەسە تۇزەتۋگە جاتپايدى. سوندىقتان اكت جازباسىنا تۇزەتۋ ەنگىزىلمەيدى. حالىققا قىزمەت كورسەتۋ ورتالىعىنا بىردەن وتىنىشپەن جۇگىنۋگە بولادى. جەكە كۋالىكتى اۋىستىرۋ كەزىندە ۇلتتىق-تاريحي داستۇرلەردى نەگىزگى سەبەپ رەتىندە كورسەتكەن ءجون. ال بالانىڭ قۇجاتىنا وزگەرىس ەنگىزىلسە، حقكو-عا نەمەسە احاج بولىمىنە قازاق ءتىلدى ترانسليتەراسياسىمەن قايتادان تۋۋ تۋرالى كۋالىككە ءوتىنىش جازۋ قاجەت.
كەي كەزدە ماماندار ءوتىنىش بەرگەن ادامنىڭ ءاتى-جونى قازاق تىلىندە قالاي دۇرىس جازىلاتىنىن وزدىگىنەن انىقتاي المايدى. وندايدا ءتىل ءبىلىمى ينستيتۋتىنان انىقتاما الۋعا بولادى. ونى دا ازاماتتىق حال اكتىلەرىن تىركەۋ بولىمىنە اپارۋ كەرەك. ءوتىنىش بەس كۇننىڭ ىشىندە قارالادى.