«ۇمىتىلماس اۋەندەر» اتتى كونسەرت ءوتتى

كەش بارىسىندا الەمدىك تانىمال كلاسسيكالىق تۋىندىلار مەن وتاندىق تانىمال كومپوزيتورلاردىڭ ۇزدىك شىعارمالارى ورىندالدى.

قۇرمانعازى وركەسترىنىڭ عيماراتىندا ق ر مادەنيەت قايراتكەرى، قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ ديريجەرى جەكسەن ايسىننىڭ «ۇمىتىلماس اۋەندەر» اتتى كونسەرتى ءوتتى، دەپ حابارلايدى Almaty-akshamy.kz

كونسەرتتە قازاقستاننىڭ حالىق ءارتيسى  روزا رىمبايەۆا، قازاقستاننىڭ ەڭبەك سىڭىرگەن قايراتكەرى، وپەرا ءانشىسى گۇلزات داۋىربايەۆا، اباي اتىنداعى مەملەكەتتىك وپەرا جانە بالەت تەاترىنىڭ ءسوليسى، وپەرا ءانشىسى دامير سادۋاحاسوۆ، حالىقارالىق جانە رەسپۋبليكالىق بايقاۋلاردىڭ لاۋرەاتى ايدوس جاباعين ونەر كورسەتتى. سونداي-اق، كەشتە شەتەل جانە قازاق كومپوزيتورلارىنىڭ تۋىندىلارى جەكسەن ايسىننىڭ وركەسترگە لايىقتاپ تۇسىرۋىمەن العاش رەت ورىندالدى.

جەكسەن ايسىن – قازاق مۋزىكاسىنىڭ تاريحىنداعى ەڭ العاشقى ونەر ورداسى ۇلتتىق وركەستردىڭ شىعارماشىلىق دامۋى ءۇشىن ايانباي ەڭبەك ەتىپ جۇرگەن ديريجەر. وركەستردىڭ ماڭدايىنا بىتكەن جارىق جۇلدىزى 1995 جىلدان بەرى قۇرمانعازى اتىنداعى قازاق ۇلتتىق حالىق اسپاپتار وركەسترىندە قىزمەت اتقارۋدا. 2004 جىلى ق ر مادەنيەت قايراتكەرى اتاعىن الدى.

كلاسسيكالىق مۋزىكا – ەشقاشان ءمانىن جانە تىڭدارمانىن جوعالتپايتىن بىردەن-بىر ونەر سالاسى.