الماتىلىق مەسەناتتار جاڭا بۋىن جاتاقحانالارىن سالىپ جاتىر
قاراۋسىز قالعان اكىمشىلىك عيماراتتىڭ ورنىندا الماتىنىڭ بولاشاق مۇعالىمدەرىنە ارنالعان جاتاقحانا پايدا بولدى
الماتى اكىمى ەربولات دوسايەۆ جەكە ينۆەستيسيالار ەسەبىنەن سالىنعان بولاشاق ۇستازدارعا ارنالعان جاڭا زاماناۋي ستۋدەنتتەر جاتاقحاناسىنا باردى.
1 ملرد 350 ملن تەڭگەنىڭ جوباسىن «Karazhal operating»، «Rise capital»، «Daco Motors KZ»، «San tyres»، «Pine education»، «Kazintel group» جانە ت.ب. 50-دەن استام كومپانيانى، مەسەنات پەن ينۆەستوردى بىرىكتىرگەن «Mugalim» قوعامدىق بىرلەستىگى جۇزەگە اسىردى.
بۇعان دەيىن الماتىنىڭ بوستاندىق اۋدانىنداعى جاروكوۆ جانە دۋنايەۆسكيي كوشەلەرىنىڭ بويىنداعى وسى ۋچاسكەدە 6 جىلدان استام ۋاقىت بويى يەسىز قالعان قاراۋسىز قالعان عيمارات بولعان. اۋدانى 2 مىڭ شارشى مەتر جانە جوبالىق قۋاتى 200 ادامعا دەيىنگى ستۋدەنتتەردىڭ جاڭا ءۇيى يەل، وكسفورد ۋنيۆەرسيتەتتەرى سياقتى جوعارى وقۋ ورىندارىنىڭ جاتاقحانالارىنىڭ حالىقارالىق ستاندارتى بويىنشا سالىنعان، مۇندا تۇراتىندار ءۇشىن كوۆوركينگ-ورتالىق، كونفەرەنس-زال، Study room، شاتىرداعى ۇلكەن تەرراسا جانە ت.ب. بارلىق جاعداي جاسالعان.
جاتاقحانا اباي اتىنداعى قازاق ۇلتتىق پەداگوگيكالىق ۋنيۆەرسيتەتى، قازاق ۇلتتىق قىزدار پەداگوگيكالىق ۋنيۆەرسيتەتى، قازاق ۇلتتىق ۋنيۆەرسيتەتى، س. دەميرەل اتىنداعى ۋنيۆەرسيتەت جانە ت.ب. جوعارى وقۋ ورىندارىنىڭ بولاشاق وقىتۋشى-ستۋدەنتتەرىنە ارنالعان.
«جاڭا زاماناۋي جاعدايدا جايلى ءومىر ءسۇرۋ مۇمكىندىگىنىڭ پايدا بولعانىنا قۋانىشتىمىز. مۇندا جوبالارمەن جۇمىس ىستەۋگە، شىعارماشىلىقپەن اينالىسۋعا بولاتىن كوۆوركينگ ورتالىعى بار، ول ءۇشىن بارلىق جاعداي جاسالعان. بۇل پاتەر جالداۋعا قالتاسى كوتەرمەيتىن ستۋدەنتتەرگە تاپتىرماس دۇنيە»، - دەدى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ستۋدەنتى جانەركە توقتاروۆا.
ساپار بارىسىندا الماتى اكىمى ەربولات دوسايەۆ بۇل نىسانداردىڭ قالانىڭ الەۋمەتتىك ينفراقۇرىلىمىن جاقسارتۋ ءۇشىن ماڭىزى زور ەكەنىن اتاپ ءوتتى.
«مۇعالىمدەردىڭ مارتەبەسىن كوتەرۋ ءۇشىن ۋاقىت تالابىنا ساي قولايلى جاعداي جاساۋ ماڭىزدى. زاماناۋ ءمۇعالىم تەك ءمۇعالىم عانا ەمەس، سونىمەن قاتار ادىسكەر، تالىمگەر، تاربيەشى. قالا اتىنان العىس ايتىپ، بيزنەسكە، مەسەناتتارعا وسىنداي ماڭىزدى الەۋمەتتىك جوبالاردى ىسكە اسىرۋعا بەلسەندى قاتىسۋعا شاقىرامىن»، - دەدى ە.دوسايەۆ.
«Mugalim» قب-نىڭ ايتۋىنشا، تاعى بىرنەشە ءبىلىم بەرۋ نىسانىن سالۋ جوسپارلانعان. جىل سوڭىنا دەيىن Zhibek Dorm قوعامدىق بىرلەستىگىنىڭ مەسەناتى تاعى 100 ورىندىق جاتاقحانا سالۋدى جوسپارلاپ وتىر. سونداي-اق، «Mugalim» قب 110 ورىندىق ستۋدەنتتەر ءۇيىن (مەسەنات – Yamoto جك) جانە 135 ورىندىق جاتاقحانانى («كەمەل» جەكە قورى) جۇزەگە اسىرۋدى جوسپارلاپ وتىر.