بۇل تۋرالى قالانىڭ باس سانيتار دارىگەرى جانداربەك بەكشين باسپا ءسوز وتىرىسىندا مالىمدەدى
الماتىدا جاڭا جىلدان كەيىن پاندەميانىڭ بەسىنشى تولقىنى باستالۋى مۇمكىن. ال ناۋرىز ايىنىڭ ورتاسىندا ىندەتتىڭ ءورشۋى ىقتيمال، دەيدى قالانىڭ باس سانيتار دارىگەرى جانداربەك بەكشين. ابىروي بولعاندا، «وميكرون» شتامى ازىرگە تىركەلمەگەن، دەپ حابارلايدى Almaty-akshamy.kz
بۇگىندە الماتىدا ەپيداحۋال تۇراقتالىپ كەلەدى. سەبەبى مەگاپوليستە ۇجىمدىق يممۋنيتەت 58،4 پايىزعا جەتتى. جالپى، جىل باسىنان بەرى كوروناۆيرۋسقا 164 477 الماتىلىق شالدىققان. بۇگىندە ەكپەنىڭ ارقاسىندا كورسەتكىش ايتارلىقتاي تومەندەپ، تاۋلىگىنە 30-دان اسا ناۋقاس تىركەلۋدە. بۇل تۋرالى قالا اكىمى باقىتجان ساعىنتايەۆ مالىمدەدى. دەگەنمەن كورشى مەملەكەتتەردە دەندەگەن «وميكرون» شتامى ءبىزدىڭ ەلىمىزدە دە پايدا بولۋى ىقتيمال دەيدى شاھار باسشىسى. سوندىقتان حالىقتى جاپپاي ريەۆاكسينالاۋ ناۋقانىنا قاتىسۋعا شاقىردى.
كوروناۆيرۋستىڭ جاڭا مۋتاسيالارى ەكپە العان نەمەسە ىندەتكە شالدىعىپ، جازىلعان ادامدارعا دا قايتا جۇعىپ جاتىر. سوندىقتان بارىنشا ۆاكسينانىڭ كۇشەيتكىش مولشەرىن الىپ، يممۋنيتەتتى نىعايتقان دۇرىس دەيدى دارىگەرلەر. قالالىق قوعامدىق دەنساۋلىق باسقارماسىنىڭ باسشىسى ناريمان تابىنبايەۆتىڭ ايتۋىنشا، مەگاپوليس پاندەميانىڭ كەزەكتى تولقىنىنا دايىن. بۇگىندە قالادا ەكپەنىڭ 585 700 دوزاسى بار. ونىڭ ىشىندە «سپۋتنيك-V» ەكپەسىنىڭ 33 756، QazVac-تىڭ 50 مىڭ، VeroCellء-دىڭ 223 مىڭ 755 جانە Pfizerء-دىڭ 277 987 مولشەرى تىركەلگەن. Pfizer-مەن يممۋندالىپ جاتقان جۇكتى كەلىنشەكتەر سانى دا كوبەيىپ كەلەدى. وسى رەتتە ماماندار ۆاكسينا ءوزىنىڭ تيىمدىلىگىن دالەلدەدى دەيدى. سەبەبى عىلىمي زەرتتەۋ جۇمىستارىنىڭ ناتيجەسىندە ەكپە الىپ، بوسانعان ايەلدەردىڭ نارەستەلەرىندە انتيدەنە ءبىراز ۋاقىت ساقتالاتىنى انىقتالعان.
«ءقازىر 50 شاقتى ايەلدىڭ بالاسىندا انتيدەنە بار ەكەنى بەلگىلەنگەن. ءبىراق قاشانعا دەيىن ساقتالاتىنى ءالى تەكسەرىلىپ جاتىر. ءقازىر 3-4 ايعا دەيىن ونىڭ كۇشى ساقتالادى دەلىنۋدە. ول عىلىمي زەرتتەۋگە بايلانىستى»، – دەدى الماتى قالالىق قوعامدىق دەنساۋلىق باسقارماسىنىڭ باسشىسى ناريمان تابىنبايەۆ.
بۇل رەتتە الەم عالىمدارى دا ەكپە بالالاردى ۆيرۋستان 100 پايىز قورعايتىنىن دالەلدەگەن ەدى. بۇگىندە ەلىمىزدە كوروناۆيرۋستىڭ تارالۋى بويىنشا احۋال تۇراقتالدى. دەگەنمەن نۇر-سۇلتان قالاسىندا قايتادان ناۋقاستار سانى كوبەيىپ كەتتى. سايكەسىنشە، بۇگىن «سارى» ايماققا ءوتتى. بۇل تىزىمدە پاۆلودار مەن سولتۇستىك قازاقستان وبلىستارى دا بار. ال قالعان 14 ءوڭىر «جاسىل» ايماقتا ورنالاسقان.