الماتىدا وتكەن قازاقستان جازۋشىلار وداعىنىڭ 90 جىلدىق مەرەيتويىنا الىس-جاقىن شەتەلدەن كەلگەن ادەبيەت قايراتكەرلەرى قاتىسىپ، ءوز قۇتتىقتاۋلارىن جەتكىزدى، دەپ حابارلايدى aqshamnews.kz.
تۇركسوي تۇركىتىلدەس مادەنيەتى ۇيىمىنىڭ باس حاتشىسى سۇلتان رايەۆ:
«جازۋشىلار وداعىنىڭ 90 جىلدىق مەرەيتويى – تەك قازاق ادەبيەتىنىڭ عانا ەمەس، بۇكىل تۇركى الەمىنىڭ ورتاق جەتىستىگى. ادەبيەت – حالىقتار اراسىنداعى رۋحاني كوپىر، ال قازاقستان جازۋشىلار وداعى سول كوپىردى مىقتاپ ۇستاپ، تۇركى حالىقتارىنىڭ بىرلىگىن نىعايتىپ كەلەدى»، - دەدى.قىرعىز جازۋشىلار وداعىنىڭ ءتوراعاسى قانىبەك يمانالييەۆ:
«قازاق جازبا ادەبيەتى ابايدان باستاۋ الىپ، مۇحتار اۋەزوۆتىڭ «اباي جولى» سىندى ماڭگىلىك مۇرالارىمەن الەم ادەبيەتىنىڭ قازىناسىن بايىتتى. قازاق ادەبيەتى – تۇركى الەمىنىڭ رۋحاني ماقتانىشى»، - ەكەنىن ايتتى.تاتارستان جازۋشىلار وداعىنىڭ ءتوراعاسى ركايل زايدۋللين:
«قازاق پەن تاتار ادەبيەتىنىڭ بايلانىسى ەجەلدەن تىعىز. ءبىزدى ورتاق تاريحىمىز عانا ەمەس، باۋىرلاس ادەبيەتىمىزدىڭ بىرلىگى دە بايلانىستىرادى. ادەبيەتىمىزدىڭ بۇل بايلانىسى بولاشاقتا دا ساقتالىپ، نىعايا بەرەتىنىنە سەنەمىز»، - دەدى.
بۇل مەرەيتوي قازاق ادەبيەتىنىڭ تەك ۇلتتىق دەڭگەيدە عانا ەمەس، حالىقارالىق ارەنادا دا جوعارى باعالانعانىن تاعى ءبىر مارتە دالەلدەدى.