قازاقستان جازۋشىلار وداعىنىڭ 90 جىلدىق مەرەيتويى سالتاناتتى تۇردە اتالىپ وتىلۋدە، دەپ حابارلايدى aqshamnews.kz
الماتىدا قازاقستان جازۋشىلار وداعىنىڭ 90 جىلدىق مەرەيتويى جوعارى دەڭگەيدە اتالىپ ءوتتى. بۇل شارا قازاق ادەبيەتىنىڭ تاريحي ماڭىزدىلىعىن كورسەتىپ، رۋحاني مۇرامىزدى ۇلىقتاعان ايتۋلى وقيعا بولدى. جازۋشىلار وداعى – قازاق ادەبيەتىنىڭ قارا شاڭىراعى، ۇلت رۋحانياتىنىڭ التىن قازىعى.
قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ مەرەيتويعا وراي جولداعان قۇتتىقتاۋ حاتىندا ۇلتتىق ادەبيەتتىڭ قوعام ومىرىندەگى ماڭىزدىلىعىن ەرەكشە اتاپ ءوتتى. مەملەكەت باسشىسى ادەبيەتتى «ويىمىزدىڭ تەرەڭدىگى مەن رۋحىمىزدىڭ اسقاقتىعىن ايعاقتايتىن ۇلى قازىنا» دەپ سيپاتتاپ، ونى زامان تالابىنا ساي دامىتۋدى مەملەكەت الدىندا تۇرعان ماڭىزدى مىندەتتەردىڭ ءبىرى دەپ كورسەتتى.
جيىن بارىسىندا قىرعىز رەسپۋبليكاسى پرەزيدەنتىنىڭ كەڭەسشىسى ارسلان قويشييەۆ سادىر جاپاروۆتىڭ قۇتتىقتاۋىن جەتكىزسە، الىس-جاقىن شەتەلدەردەن كەلگەن مادەنيەت جانە ادەبيەت قايراتكەرلەرى قازاق ادەبيەتىنىڭ باعا جەتپەس مۇراسىنا دەگەن قۇرمەتىن ءبىلدىردى.
قازاقستان جازۋشىلار وداعىنىڭ قازىرگى ءتوراعاسى مەرەكە قۇلكەنوۆ سالتاناتتى شارادا قازاق ادەبيەتىنىڭ بۇگىنگى جاڭارۋ ۇدەرىسى مەن شىعارماشىلىقتاعى تىڭ سەرپىن تۋرالى بايانداما جاسادى. ول ادەبيەت قوعامداعى تۇراقتىلىق پەن رۋحاني دامۋدىڭ باستى قوزعاۋشى كۇشى ەكەنىن اتاپ ءوتتى.
ۇلت رۋحانياتىنا ولشەۋسىز ۇلەس قوسقان جازۋشىلار وداعىنىڭ بۇل مەرەيتويى قازاق قالامگەرلەرىنىڭ بىرلىگىن، ادەبيەتىمىزدىڭ الەمدىك دەڭگەيدەگى ورنىن ايقىندادى. ۇلتتىق ادەبيەت بولاشاق ۇرپاققا ميراس بولىپ، جاڭاشا بيىكتەرگە جەتۋ جولىندا دامۋىن جالعاستىرا بەرمەك.