قازاقستاندا بالالاردىڭ جازعى مەكتەپتەگى وقۋى اياقتالدى.
ق ر وقۋ-اعارتۋ مينيسترلىگىنىڭ باسپا ءسوز قىزمەتىنەن ءمالىم ەتكەنىندەي، جازعى مەكتەپتەردە 2 ميلليونعا جۋىق بالا قوسىمشا ءبىلىم الدى.
ولاردىڭ جۇمىسى 26 مامىر مەن 17 ماۋسىم ارالىعىندا ۇيىمداستىرىلعان بولاتىن. جازعى مەكتەپ وقۋشىلار بىلىمىندەگى ولقىلىقتىڭ ورنىن تولتىرۋعا مۇمكىندىك بەردى. وعان 9، 11-سىنىپ وقۋشىلارىنان باسقا بارلىق وقۋشى ەرىكتى تۇردە قاتىستى.
«3،6 ملن وقۋشىنىڭ 2 ميلليونعا جۋىعى جازعى مەكتەپتە ءبىلىم الدى. بالالار مەن ولاردىڭ اتا-انالارىنىڭ قالاۋى بويىنشا 38 مىڭنان استام وقۋشىعا جەكە پاندەر بويىنشا ساباقتار ۇيىمداستىرىلدى. بالالاردى ىنتالاندىرۋ ماقساتىندا ساباق ستاندارتتى فورمادا ەمەس، باعالاۋسىز وتكەنىن دە اتاپ وتكەن ءجون. وقۋ كەستەسىنە مۋزەيلەرگە ساياحات، ەكسكۋرسيالار، ىسكەرلىك ويىندار، شەبەرلىك ساباقتار، فيلمدەر مەن مۋلتفيلمدەردى تالقىلاۋ كىردى. كىتاپ كلۋبتارى، ديسكۋسسيالار، ستراتەگيالىق سەسسيالار، دەباتتار جانە باسقا دا فورماتتا ساباقتار ۇيىمداستىرىلدى. جازعى مەكتەپتىڭ قورىتىندىسى بويىنشا اتا-انالاردىڭ وڭ پىكىرلەرىن الدىق»، – دەپ ايتتى مەكتەپكە دەيىنگى جانە ورتا ءبىلىم بەرۋ كوميتەتىنىڭ ءتوراعاسى گۇلميرا كارىموۆا.
وقۋشىلار ساباقتارعا دۇيسەنبىدەن جۇماعا دەيىن قاتىستى. وقۋ ماتەماتيكا، قازاق ءتىلى، اعىلشىن ءتىلى، فيزيكا، حيميا جانە تاعى باسقا نەگىزگى پاندەر بويىنشا ءوتتى. ايتا كەتەيىك، جازعى مەكتەپ اياقتالعان سوڭ مۇعالىمدەر جىل سايىنعى ەڭبەك دەمالىسىنا شىعادى. بۇعان دەيىن پەداگوگتەردىڭ دەمالىسى 42-دەن 56 كۇنگە دەيىن ۇزارتىلعان بولاتىن.