الماتى اكىمى ەربولات دوسايەۆ مەدەۋ اۋدانىنىڭ تۇرعىندارىمەن كەزدەستى.
اۋدان تۇرعىندارىمەن وتكەن كەزدەسۋدە سۋمەن جابدىقتاۋ ماسەلەسى كوتەرىلدى، دەپ حابارلايدى Almaty-akshamy.kz
قازىرگى ۋاقىتتا مۇزتاۋ، كولساي، سۇلۋساي جانە كەڭساي شاعىناۋداندارىندا ورتالىق سۋ جۇيەسى مەن سۋ كوزى جوق.
"2021 جىلى «مۇزتاۋ» جانە «كولساي» شاعىن اۋداندارىندا 32 كم. سۋمەن جابدىقتاۋ جانە سۋ بۇرۋدىڭ تاراتۋشى جەلىلەرى سالىندى.
ءقازىر وسى شاعىناۋدانداردى سۋ كوزىمەن قامتاماسىز ەتۋ ءۇشىن «بالقاش» سۋ جيناۋ ستانسياسىنا دەيىن جالعاۋشى ماگيسترالدىق جەلى جوباسى ازىرلەنىپ جاتىر. جوبالاۋ قۇجاتتارى وسى جىلدىڭ تامىز ايىندا دايىن بولادى"، - دەدى قالا اكىمى ەربولات دوسايەۆ.
قۇرىلىس-مونتاجداۋ جۇمىستارى كەلەسى جىلدىڭ كوكتەمگى كەزەڭىندە (2023 جىلعى ءساۋىر) باستالادى.
«سۇلۋساي» شاعىناۋدانى بويىنشا «الماتى سۋ» وسى جىلدىڭ تامىز ايىندا ماگيسترالدىق سۋ قۇبىرى جانە كاناليزاسيا جەلىلەرىن سالۋ جوباسىن اياقتايدى. سكۆاجينالار قازىلادى.
جوبانى ىسكە اسىرۋ 2023 جىلعا جوسپارلانعان. «سۇلۋساي» شاعىناۋدانىنىڭ وڭتۇستىك بولىگىندە سكۆاجينالار قازىلادى (ەڭ جوعارى نۇكتەسى).
«كەڭساي» شاعىناۋدانىنداعى م.شوقاي جانە سارسەنبايەۆ كوشەلەرىنە سۋمەن جادبىقتاۋ مەن سۋ بۇرۋدىڭ ماگيسترالدىق جەلىلەرىن سالۋ جوباسى ازىرلەندى. قۇرىلىسى 2023 جىلعا جوسپارلانعان.
"الايدا، باۋ-باقشا سەرىكتەستىكتەرىندە كوشەلەردىڭ تار بولۋىنان جەتى مەترلىك ينجەنەرلىك ءدالىز جۇرگىزىلمەگەن. سوندىقتان تاراتۋ جەلىلەرىن سالۋعا مۇمكىندىك جوق. جوبانى ىسكە اسىرۋ تۇرعىنداردىڭ وزدەرىنە بايلانىستى. سىزدەر قاجەتتى ءدالىزدى ۇسىناتىن بولساڭىزدار، ءبىز بىردەن سۋمەن جابدىقتاۋ جانە كاناليزاسيا جەلىلەرىن سالا الامىز"، - دەدى شاھار باسشىسى.