گۇلدەر نەتكەن اسەم، نەتكەن نازىك! قىزىلدى-جاسىلدى گۇلدەر ارۋ الماتىنىڭ سۇلۋلىعىن ۇستەپ تۇرعانى انىق. ءيا، ءبىزدىڭ قالا جازدا ادەمى گۇلدەرگە ورانىپ تۇرادى. اسىرەسە، قازاقى ويۋلار بەينەسىندە وتىرعىزىلعان گۇلدەر كوزدىڭ جاۋىن ۇرلايدى.
الماتىنىڭ بىردە-بىر ساياباعى گۇلسىز ەمەس، ءىرى عيماراتتاردىڭ دا، شاعىن مەكەمەلەردىڭ الدى دا گۇلدەرگە تولى. ءتۇرلى وسىمدىكتەرى جايقالعان تروتۋارلارمەن قىدىرىپ، سەرۋەندەگەن دە ءبىر عانيبەت! جانعا راحات سىيلايدى. كوڭىلىڭىز كوتەرىلىپ سالا بەرەدى. كوڭىلىڭىز كوتەرىلىپ سالا بەرەدى. ادەمىلىك بالاعا دا، ۇلكەنگە دە كوپتىك ەتپەيدى.
ايتپاقشى، جاسىل جەلەكتىڭ اۋاسىندا ادام دەنساۋلىعىنا قاجەتتى جەڭىل يوندار بولادى. سونىڭ ارقاسىندا سىرتتا سەرۋەندەپ جۇرگەن ادامنىڭ قان قۇرامى جاقسارىپ، قان قىسىمى دا ءبىر قالىپقا كەلەدى ەكەن، سونداياق جۇمىسقا دەگەن قابىلەتى دە ارتاتىن كورىنەدى.
سول گۇلدەردەن ءلاززات الاتىن تەك ءبىز، ادامدار، عانا ەكەنبىز. ال كوبەلەك، ارا سىندى شىبىن-شىركەيلەرگە كەرەگى – ولاردىڭ ءتۇسى، ءيسى. ويتكەنى، گۇلدەر - بۇل جاندىكتەردىڭ ازىعى: بىرەۋلەرىن شىرىنىمەن، ال كەيبىرىن توزاڭىمەن قورەكتەندىرەدى.
وسىمدىكتەردىڭ ۇرىق سالۋى ءۇشىن ءبىر گۇلدىڭ توزاڭىن ەكىنشى گۇلگە كوشىرۋ قاجەت. ال سول توزاڭدى تاسىمالدايتىن الگى شىبىن-شىركەيلەر. ياعني شىرىننىڭ ءتاتتى تامشىسىن الىستان ءبىلىپ ۇشىپ كەلگەن كوبەلەك گۇلگە قونادى، سول ساتتە وعان توزاڭ دا جابىسا كەتەدى. سوسىن كوبەلەك كەلەسى ءبىر گۇلگە قونعاندا، ونىڭ اياقتارىمەن ىلەسە كەلگەن توزاڭ دا ەكىنشى گۇلگە جابىسىپ ۇلگىرەدى.
توزاڭدى تەك كوبەلەكتەر عانا ەمەس، باسقا شىبىن-شىركەيلەر دە تاسىمالدايدى. تەك ءارقايسىسى ءار گۇلدى ۇناتادى ەكەن. ماسەلەن، بال اراسى مەن جاي ارا دا ىنجۋگۇلگە قونبايتىن كورىنەدى. ال ماسا بىتكەن ىنجۋگۇلدى جاقسى كورەدى دەسەدى. كەيبىر گۇلدەر كەش تۇسە عانا اشىلىپ، ءوزىنىڭ حوش ءيىستى شىرىنىن تۇندە بەرىپ تۇگەسەدى. ادەتتە مۇنداي گۇلدەردىڭ ءتۇسى اق بولادى. ولارعا تۇنگى كوبەلەكتەر اۋەس كەلەدى.
مىنە، گۇلدەردىڭ ادامعا دا، جاندىكتەرگە دە پايداسى مول. گۇلدەر، ادەتتە، مەگاپوليستىڭ كىسى اياعى كوپ جۇرەتىن جەرلەرىندە، ورتالىق، ءىرى كوشەلەردىڭ بويىندا وسىرىلەدى. ءبىراق كوپ قاباتتى ۇيلەرىمىزدىڭ اۋلاسىنا وسىرە بەرمەيمىز. سەبەبى، اينالانى كورىكتەندىرۋ تەك اكىمدىكتىڭ جۇمىسى دەپ ويلايمىز كوبىمىز. ال ەگەر ءبارىمىز اۋلامىزعا گۇل ەگىپ، ونى ەرەكشە باپتاپ وسىرسەك، ءوزىمىز تۇراتىن اۋداننىڭ اجارى دا ارتا تۇسپەي مە؟ ماسەلەن، ەۋروپا ەلدەرىندە تۇرعىندار اۋلاداعى ءوسىپ تۇرعان گۇلدەردى وزدەرى كۇتىمگە العان. ءبىز دە - تابيعاتتىڭ ءبىر بولشەگىمىز. اۋلا دا، اۋا دا بارىمىزگە ورتاق بولعاندىقتان، ونى كوركەيتۋدى ءار ادام پارىزى دەپ ساناسا، ارتىق بولماس ەدى.