جازدا تەمپەراتۋرانىڭ ءجيى اۋىسۋى، كونديسيونەر مەن سالقىن تاعام-سۋسىنداردىڭ اسەرىنەن اعزا السىرەپ، كۇتپەگەن جاعدايدا سىر بەرە باستايدى. بۇل جاي عانا تۇماۋ ەمەس - اسقىنۋعا بەيىم، ەلەۋسىز قالدىرۋعا بولمايتىن پروسەسس. وسىعان بايلانىستى اqshamnews.kz ءتىلشىسى مەديسينا عىلىمدارىنىڭ دوكتورى، نيۋكاسل ۋنيۆەرسيتەتىنىڭ تۇلەگى، ينتەگراتيۆتى تەراپيەۆت-دارىگەر ساعىندىقوۆا ءاليا ابحانقىزىمەن سۇحباتتاسىپ، جازعى سۋىق ءتيۋدىڭ سەبەبى مەن سالدارى تۋرالى اڭگىمەلەستى.
ءاليا ساعىندىقوۆا
تەراپيەۆت-دارىگەر
جازعى سۋىق نەگە اۋىر وتەدى؟
دارىگەردىڭ ايتۋىنشا، جازدا سۋىق تيۋ كەيدە قىسقا قاراعاندا اۋىر ءوتۋى مۇمكىن. سەبەبى ادامنىڭ اعزاسى ىستىق اۋا رايىنا بەيىمدەلىپ تۇرادى دا، كەنەتتەن كونديسيونەردىڭ نەمەسە مۇزداي سۋسىنداردىڭ اسەرىنەن دەنە تەمپەراتۋراسى تەز سۋيدى.
"قىستا ادامدار جىلى كيىنىپ، سىرتقى ورتادان قورعانۋعا تىرىسادى، ال جازدا ونداي ساقتىق جوق. ونىڭ ۇستىنە، جازدا تۇماۋ بەلگىلەرىنە ءمان بەرمەي جۇرە بەرۋ دە ءجيى كەزدەسەدى. بۇل جاعداي قابىنۋدىڭ اسقىنۋىنا اكەلۋى مۇمكىن"، - دەيدى دارىگەر.
كونديسيونەردى دۇرىس قولدانۋدىڭ ەرەجەسى
كونديسيونەر مەن جەلدەتكىش - جازداعى جايلىلىق كەپىلى عانا ەمەس، دۇرىس پايدالانباسا، ءقاۋىپ كوزى. دارىگەردىڭ ايتۋىنشا، كونديسيونەردىڭ سۋىق اعىنى ادامنىڭ بەتىنە نەمەسە ارقاسىنا تىكەلەي باعىتتالماۋى كەرەك.
"تەمپەراتۋرا ايىرماشىلىعى 5–7°C-تان اسپاۋى ءتيىس. ۇيىقتاپ جاتقاندا جەلدەتكىشتى وزىڭىزگە باعىتتاۋ - مويىن مەن بەلگە سۋىق تيۋ ءقاۋپىن ارتتىرادى"، - دەيدى ءاليا حانىم.
سونىمەن قاتار، بولمەنى ءجيى جەلدەتىپ، ىلعالدىلىقتى ساقتاۋ - تىنىس الۋ جولدارى ءۇشىن ماڭىزدى.
يممۋنيتەت ءالسىز بولسا، ۆيرۋسقا جول اشىلادى
دارىگەر جازعى يممۋنيتەتتى نە السىرەتەتىنىن ايتىپ بەردى.
"يممۋنيتەت مىقتى بولسا، اعزا كەز كەلگەن سۋىققا قارسى تۇرا الادى. ءبىراق جازدا دۇرىس تاماقتانباۋ، ۇيقىنىڭ بۇزىلۋى، ارتىق سترەسس پەن سۋسىزدىق يممۋن جۇيەسىن السىرەتەدى"، - دەيدى دارىگەر.
يممۋنيتەتتى كۇشەيتۋ ءۇشىن جەتكىلىكتى ۇيىقتاۋ، تەڭگەرىمدى راسيون، تازا اۋادا قوزعالىس جانە كۇيزەلىستى ازايتۋ قاجەت.
ەنەرگيا جەتىسپەۋشىلىك نەدەن تۋادى؟
جازدا ادامداردىڭ ەنەرگياسى ازايىپ، ۇنەمى شارشاڭقى جۇرەتىنى ءجيى بايقالادى. ءاليا ابحان قىزى مۇنداي جاعدايدا ەنەرگەتيك سۋسىندارعا جۇگىنۋدىڭ ورنىنا، تابيعي ونىمدەردى تۇتىنۋعا كەڭەس بەرەدى. ونىڭ ىشىندە كوك شاي، ليمون قوسىلعان جىلى سۋ، بانان مەن جاڭعاقتار، تاڭعى س ۇلى بوتقاسى مەن يوگۋرت - اعزانى قۋاتتاندىرىپ، ۇزاق مەرزىمدى سەرگەكتىك بەرەدى.
"جازدا اعزانى تىڭداۋ كەرەك. دەنە شارشاعانىن بىلدىرسە - دەمالىس پەن ۇيقىعا دۇرىس كوڭىل ءبولىڭىز. بۇل - شارشاۋدىڭ ەڭ جاقسى ەمى"، — دەيدى دارىگەر.
سونداي-اق، سوزىلمالى سترەسس اعزانى السىرەتىپ، سۋىق تيۋگە بەيىم ەتەدى. مۇنداي جاعدايدا ادامدار تۇماۋ، گەرپەس سياقتى ۆيرۋستىق اۋرۋلارعا ءجيى شالدىعادى. ۇيقىسىزدىق، اسقازان-ىشەك جولدارىنىڭ بۇزىلۋى، قان قىسىمىنىڭ تۇراقسىزدىعى سياقتى ماسەلەلەر دە ۋشىعا تۇسەدى.