جازاسىن وتەپ جاتقان ايەلدەرگە ارناپ مەرەكەلىك كەش ءوتتى

سالتاناتتى كەش قوناقتارىن مەرەكەلىك داستارحانعا شاقىرىپ، ءىلتيپات كورسەتتى

الماتىداعى تەرگەۋ يزولياتورىندا جازالى ايەلدەرگە ارنالعان مەرەكەلىك كەش ءوتتى، دەپ حابارلايدى Almaty-akshamy.kz. 

حالىقارالىق ايەلدەر مەيرامى الماتى قالاسى بويىنشا قاجد لا-155/18 مەكەمەسىندەگى (تەرگەۋ يزولياتورى) شارۋاشىلىق قىزمەتتەگى سوتتالعاندار اراسىندا دا جىل سايىن كوتەرىڭكى كوڭىل-كۇيمەن اتاپ وتىلەدى.

بيىل دا شارۋاشىلىق قىزمەت جاساعىنىڭ ەر-ازاماتتارى وزدەرىمەن بىردەي جازالارىن وتەپ جۇرگەن ايەلدەرگە ارناپ  كوڭىلدى كەش ۇيىمداستىردى.
مەرەكەلىك سالتانات الدىندا سوتتالعاندار جاساقتاعى قىز-كەلىنشەكتەردى سازدى اۋەن سالتاناتىمەن قارسى الىپ، گۇل شوقتارىن ۇسىندى. جىگىتتەردىڭ سوتتالعان ايەلدەرگە عانا ەمەس، وزدەرىنىڭ انالارى مەن قارىنداستارىنا، جارلارىنا ارناپ سالعان اندەرى مەن جۇرەكتەن شىققان ارناۋ ولەڭدەرى كەشكە قاتىسۋشىلاردى ۇلكەن اسەرگە بولەدى.

جازالى ازاماتتار سونداي-اق، سالتاناتتى كەش قوناقتارىن مەرەكەلىك داستارحانعا شاقىرىپ، ءىلتيپات كورسەتتى. لا-155/18 مەكەمەسىنىڭ تاربيە ءبولىمىنىڭ ۇيىمداستىرۋىمەن وتكەن مەرەكەلىك كەشتە اتالعان ءبولىمنىڭ باستىعى ادىلەت مايورى ك.تۇرلىبەكوۆ قۇتتىقتاۋ ءسوز سويلەپ، تەمىر توردىڭ ار جاعىندا جۇرسە دە، انالار مەن ارۋلار مەرەكەسىندە ازاماتتىق تانىتىپ، مەرەكەگە قاتىسقان بەلسەندى سوتتالعاندارعا العىس ءبىلدىردى.