كىتاپقا قاسىم-جومارت توقايەۆتىڭ قازاقستان حالقىنا ارناعان ەكى جولداۋى، ءۇش ماقالاسى مەن 63 بايانداماسى ەنگەن
ق ر ءىىم م.ەسبولاتوۆ اتىنداعى الماتى اكادەمياسىندا «قاسىم-جومارت توقايەۆ. قازاقستان رەسپۋبليكاسى پرەزيدەنتىنىڭ تاڭدامالى ەڭبەكتەرى» اتتى كىتاپتىڭ تۇساۋكەسەرى ءوتتى، دەپ حابارلايدى Almaty-akshamy.kz.
اكادەميا باستىعىنىڭ ورىنباسارى پوليسيا پولكوۆنيگى س.م.كەنەنبايەۆ تۇساۋكەسەر قوناقتارىنا باسىلىمنىڭ جاۋاپتى رەداكتورى، قازاقستان-نەمىس ۋنيۆەرسيتەتى حالىقارالىق جانە ايماقتىق ىنتىماقتاستىق عىلىمي-زەرتتەۋ ينستيتۋتىنىڭ (يميرس) ديرەكتورى، پروفەسسور، ساياساتكەر جانە مەملەكەت قايراتكەرى بولات سۇلتانوۆتى تانىستىردى.
بولات كلىچباي ۇلى اكادەميا ۇجىمىنا ارناعان قۇتتىقتاۋ سوزىندە قيىن-قىستاۋ قاڭتار كۇندەرىندە پرەزيدەنتكە قولداۋ كورسەتكەندەرى ءۇشىن پوليسيا قىزمەتكەرلەرىنە شەكسىز العىسىن ءبىلدىردى.
«قاسىم-جومارت توقايەۆ. قازاقستان رەسپۋبليكاسى پرەزيدەنتىنىڭ تاڭدامالى ەڭبەكتەرى» كىتابىندا ەلىمىزدە بولىپ جاتقان يگىلىككە باعىتتالعان وزگەرىستەر، مەملەكەت باسشىسى قولعا الىپ جاتقان باسىمدىقتار مەن ناتيجەلى قادامدار، جاڭا قازاقستاندى قۇرۋ باعىتىنداعى رەفورمالار ستراتەگياسى تۋرالى ناقتى ايتىلعان.
CNPC International Kazakhstan LTD قولداۋىمەن قازاقستان-نەمىس ۋنيۆەرسيتەتىنىڭ حالىقارالىق جانە ايماقتىق ىنتىماقتاستىق عىلىمي-زەرتتەۋ ينستيتۋتى (يميرس) باسىپ شىعارعان جيناققا قازاقستان رەسپۋبليكاسىنىڭ پرەزيدەنتى ق-ج. توقايەۆتىڭ 2019 جىلدىڭ 20 ناۋرىزى مەن 2021 جىلدىڭ 30 ءساۋىرى ارالىعىندا جاريالانعان ەڭبەكتەرى توپتاستىرىلعان.
مەملەكەت باسشىسىنىڭ كىتاپتاعى 68 ەڭبەگىنىڭ ىشىندە پرەزيدەنت ق-ج. توقايەۆتىڭ قازاقستان حالقىنا ارناعان ەكى جولداۋى، ءۇش ماقالاسى مەن 63 بايانداماسى، سونداي-اق ەلىمىزدىڭ ىشكى جانە سىرتقى ساياساتىن جانە ەلدى الەۋمەتتىك-ەكونوميكالىق تۇرعىدان دامىتۋ تۋرالى ۇندەۋلەرى مەن مالىمدەمەلەرى بار.
اتالعان كىتاپتىڭ جارىققا شىعۋى عىلىمي ورتانىڭ – تاريحشىلار مەن ساياساتتانۋشىلاردىڭ، ساراپشىلاردىڭ جانە ۇلتتىق تاريح، حالىقارالىق قاتىناستار، ەلىمىزدىڭ سىرتقى جانە ىشكى ساياساتى ماسەلەلەرىمەن اينالىساتىنداردىڭ قىزىعۋشىلىعىن تۋدىرۋدا. قازاقستاننىڭ جاڭا تاريحىنان مالىمەت بەرەتىن، دوكۋمەنتالدى دەرەككوزدەرگە نەگىزدەلگەن جيناق ق ر ءىىم الماتى اكادەمياسىنىڭ پروفەسسورلىق-وقىتۋشىلىق قۇرامى مەن تىڭداۋشىلارىنىڭ دا سۇرانىسىنا يە بولارى ءسوزسىز.