اۋرۋدى ەرتە انىقتاۋ تولىق قالپىنا كەلۋ مۇمكىندىگىن ايتارلىقتاي ارتتىرادى. بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا الماتى ونكولوگيالىق ورتالىعىنىڭ ساراپشىلارى حابارلادى.
«ادام پاپيللوما ۆيرۋسى جاتىر موينى وبىرىنىڭ ءقاۋىپ فاكتورلارىنا جاتادى. سوندىقتان جاتىر موينى وبىرىنىڭ الدىن الۋ جانە ەرتە دياگنوستيكاسى ەرەكشە ماڭىزدى. جاتىر موينى وبىرىنىڭ الدىن الۋدىڭ نەگىزگى ءادىسى اپۆ-عا قارسى ۆاكسيناسيا بولىپ تابىلادى»، - دەپ اتاپ ءوتتى الماتى ونكولوگيالىق ورتالىعى ديرەكتورىنىڭ ورىنباسارى اليا تۋرەشيەۆا.
ساراپشى جاتىر موينى وبىرىن ەرتە انىقتاۋ ماقساتىندا رەسپۋبليكادا 30 جاستان 70 جاسقا دەيىنگى ايەلدەردى 4 جىلدا 1 رەت كەزەڭدىلىكپەن سكرينينگتىك تەكسەرۋلەر جۇرگىزىلەتىنىن اتاپ ءوتتى.
ماسەلەن، 2023 جىلدىڭ قورىتىندىسى بويىنشا الماتى قالاسىندا جاتىر موينى وبىرىنىڭ 223 جاعدايى انىقتالدى (ەسەپكە الىنعان بارلىق ونكولوگيالىق ناۋقاستاردىڭ 4،1%)، ونىڭ ىشىندە ەرتە ساتىسىندا – 142. بارلىعى جمو بار 2522 ايەل ەسەپتە تۇر.
«سكرينينگتىك تەكسەرۋلەر كەزىندە 38 جاعداي انىقتالدى، بارلىعى 0-1 كەزەڭدە. وسى كەزەڭدەردەگى مامانداندىرىلعان ەمدەۋ تولىق قالپىنا كەلتىرۋگە مۇمكىندىك بەرەدى. قازاقستان رەسپۋبليكاسى حالقىنىڭ ونكولوگيالىق اۋرۋلارىنا قارسى كۇرەس جونىندەگى 2023-2027 جىلدارعا ارنالعان كەشەندى جوسپار شەڭبەرىندە 11 جاستاعى قىزداردى اپۆ-عا قارسى ۆاكسيناسيالاۋ جۇرگىزىلەتىن بولادى»، - دەپ ءبولىستى ول.
جۋرناليستەردىڭ سۇراقتارىنا جاۋاپ بەرە وتىرىپ، ا. تۋرەشيەۆا ەرەسەك جاستا ۆاكسيناسيا دا ءتيىمدى بولۋى مۇمكىن ەكەنىن اتاپ ءوتتى: ول ادامدى ءالى ۇشىراسپاعان اپۆ تۇرلەرىنەن قورعاي الادى.
«دۇنيەجۇزىلىك دەنساۋلىق ساقتاۋ ۇيىمى 26 جاسقا دەيىنگى ادامدارعا ۆاكسيناسيالاۋدى ۇسىنادى. كەيبىر جاعدايلاردا دارىگەر اقش-تاعى سياقتى ەكپەنى 46 جاسقا دەيىن الۋعا كەڭەس بەرە الادى. ءبىراق الدىمەن ءسىزدىڭ دەنەڭىزدە ۆيرۋس بار-جوعىن تەكسەرىپ، تەرىس ناتيجە بولعان جاعدايدا ۆاكسيناسيالاۋ كەرەك. ءسىز بۇل ينفەكسيانىڭ تاسىمالداۋشىسى ەمەس ەكەنىڭىزگە جانە اۋىرمايتىنىڭىزعا سەنىمدى بولۋىڭىز كەرەك»، - دەدى سپيكەر.
بريفينگكە قاتىسقان الماتى ونكولوگيالىق ورتالىعىنىڭ ونكوگينەكولوگيا بولىمشەسىنىڭ مەڭگەرۋشىسى رايحان بولاتبەكوۆا دا ۆاكسيناسيالاۋدىڭ ماڭىزدىلىعىن اتاپ ءوتتى.
«ۆاكسينانىڭ اسەر ەتۋ ۇزاقتىعى يممۋنوگەندىلىك دەپ اتالادى. كوپتەگەن زەرتتەۋلەرگە سايكەس يممۋنوگەندىلىك ۆاكسيناسيادان كەيىن 8 جىلدان 10 جىلعا دەيىن ساقتالادى. سول زەرتتەۋشىلەردىڭ ايتۋىنشا، اۋقىمدى يممۋنداۋدان كەيىن ريەۆاكسيناسيا قاجەت ەمەس ەكەنىن بىلەمىز»، - دەپ قورىتىندىلادى ول.