4 ناۋرىز ادام پاپيللوما ۆيرۋسى تۋرالى حالىقارالىق حاباردارلىق كۇنى بولىپ جاريالاندى. وڭىرلىك كوممۋنيكاسيالار قىزمەتىنىڭ الاڭىندا الماتى ونكولوگيالىق ورتالىعى ساراپشىلارىنىڭ قاتىسۋىمەن بريفينگ ءوتتى، ولار پۆ-مەن بايلانىستى اۋرۋلاردىڭ الدىن الۋ، ەرتە انىقتاۋ جانە ەمدەۋدىڭ ماڭىزدىلىعى تۋرالى ايتتى.
ادامنىڭ پاپيللوما ۆيرۋسى - جاتىر موينى وبىرىنىڭ، ەرلەر مەن ايەلدەردىڭ سىرتقى جىنىس مۇشەلەرىنىڭ قاتەرلى ىسىگىنىڭ، اۋىز قۋىسىنىڭ قاتەرلى ىسىگىنىڭ جانە انوگەنيتالدى سۇيەلدەردىڭ دامۋىن تۋدىراتىن ينفەكسيا (ۆيرۋس).
«پاپيللوما ۆيرۋستىڭ 200-گە جۋىق تۇرىنەن تۇراتىن توپ، ونىڭ 14 ءتۇرى ادامدار ءۇشىن ءقاۋىپتى دەپ تانىلعان. بۇل ۆيرۋس الەمدەگى ەڭ كوپ تارالعان ۆيرۋستاردىڭ ءبىرى بولىپ تابىلادى جانە ادامداردىڭ كوپشىلىگى ءومىر بويى ءاپۆ-نىڭ قانداي دا ءبىر ءتۇرىن جۇقتىرادى. جىنىستىق بەلسەندى جاستاعى ايەلدەر مەن 25-30 جاسقا دەيىنگى ەر ادامدار ينفەكسياعا ءجيى ۇشىرايدى»، - دەدى الماتى ونكولوگيالىق ورتالىعى ديرەكتورىنىڭ ورىنباسارى تۋرەشيەۆا اليا.
كوپ جاعدايدا اپۆ ينفەكسياسى ەمدەلۋسىز قالپىنا كەلەدى. الايدا، كەيبىر ادامداردا بۇل ۆيرۋس ينفەكسياسى قاتەرلى ىسىكتىڭ دامۋىنا اكەلۋى مۇمكىن.
الدىن الۋ باعدارلامالارى - جاتىر موينى وبىرىن ۆاكسيناسيالاۋ جانە سكرينينگ جوعارى ءتيىمدى دەپ تانىلدى.
ۆاكسيناسيانىڭ ەكونوميكالىق تيىمدىلىگى كوپتەگەن زەرتتەۋلەردە دالەلدەندى. جاتىر موينى وبىرىنا قارسى ۆاكسيناسيا ءارتۇرلى ەلدەردە اۋرۋشاڭدىق پەن ءولىمدى 70-تەن 97% - عا دەيىن تومەندەتەدى.
«بۇگىنگى تاڭدا جاتىر موينى وبىرى دامۋشى ەلدەردەگى ايەلدەردە ءجيى كەزدەسەتىن قاتەرلى ىسىكتەردىڭ ءبىرى بولىپ تابىلادى. قاتەرلى ىسىكتى زەرتتەۋ جونىندەگى حالىقارالىق اگەنتتىكتىڭ بولجامدى مالىمەتتەرى بويىنشا، دامۋشى ەلدەردە جاتىر موينى وبىرىمەن سىرقاتتانۋشىلىقتىڭ ارتۋى كۇتىلۋدە، وسىعان بايلانىستى وسى اۋرۋدىڭ الدىن الۋعا كوبىرەك كوڭىل بولىنۋدە. قاتەرلى ىسىكتى زەرتتەۋ جونىندەگى حالىقارالىق اگەنتتىكتىڭ مالىمەتتەرى بويىنشا، 2020 جىلى جاتىر موينى وبىرىنىڭ 604 000 جاڭا جاعدايى انىقتالعان جانە وسى اۋرۋدان 342 000 ادام قايتىس بولدى، ولاردىڭ نەگىزگى ۇلەسى دامۋشى ەلدەردەگى ايەلدەرگە تيەسىلى»، - دەپ قوستى ول.
ساراپشى اتاپ وتكەندەي، ەلدە جاتىر موينى وبىرى ونكولوگيالىق اۋرۋلار بويىنشا ەكىنشى ورىندا تۇر، جىل سايىن بۇل دەرتتىڭ 1900-دەن استام جاڭا جاعدايى تىركەلەدى جانە وسى اۋرۋدان 600-گە جۋىق ادام قايتىس بولادى.
سونىمەن قاتار، ول 2024 جىلدىڭ كۇزىندە اتا-اناسىنىڭ كەلىسىمىمەن 11 جاستاعى ءجاسوسپىرىم قىزداردى ۆاكسيناسيالاۋدى باستاۋ جوسپارلانعانىن ەسكە سالدى.