ءال-فارابي اتىنداعى قازاق ۇلتتىق ۋنيۆەرسيتەتىندە ءارقايسىسى 1 060 ورىندىق، جالپى 3 180 ورىنعا ارنالعان زاماناۋي ءۇش جاتاقحانا قۇرىلىسىنىڭ ىرگەتاسىن قالاۋ ءراسىمى ءوتتى.
قازۇۋ قالاشىعى قۇرىلىسىنىڭ ءىى كەزەڭى اياسىندا سالىنعالى جاتقان جاتاقحانالار 2024 جىلدىڭ كۇزىندە اياقتالادى دەپ جوسپارلانۋدا، دەپ حابارلايدى اlmaty-akshamy.kz.
9 قاباتتى ءۇش جاتاقحانانىڭ جالپى اۋدانى 49 703،94 شارشى مەتردى، ال عيماراتتى سالۋعا بولىنگەن اۋماق 1،24 گەكتاردى قۇرايدى. ستۋدەنتتەر ءۇيىنىڭ ءار قاباتىندا زاماناۋي وقۋ زالدارى، دەمالىس ورىندارى، اسحانا، كوفەحانا، سپورتزال، تۇرمىستىق بولمەلەر قاراستىرىلعان. 70 شارشى مەترلىك تولىققاندى جابدىقتالعان ءبىر بولمە 4 ادامعا ارنالعان.
ونىڭ ىشىندە ءۇش جاتاقحانادا ينكليۋزيۆتى ءبىلىم بەرۋ تالاپتارىن ورىنداۋ ماقساتىندا مۇمكىندىگى شەكتەۋلى ءبىلىم الۋشى جاستارعا ارنايى 132 توسەك-ورىن قاراستىرىلعان.
سالتاناتتى شاراعا ۋنيۆەرسيتەت باسشىلىعى، قازۇۋ ارداگەرلەرى، ينۆەستورلار، ب ا ق وكىلدەرى، وقۋ ورداسىنىڭ وقىتۋشى-پروفەسسورلار قۇرامى مەن ءبىلىم الۋشى جاستار قاتىستى.
2022 جىلى 1 ماۋسىمدا مەملەكەت باسشىسى قاسىم-جومارت توقايەۆ ءال-فارابي اتىنداعى قازاق ۇلتتىق ۋنيۆەرسيتەتىنىڭ قىزمەتىمەن تانىسىپ، قازۇۋ قالاشىعى قۇرىلىسى ءىى كەزەڭىنىڭ باس جوسپارىنا ۇلكەن قولداۋ بىلدىرگەن بولاتىن. ال اعىمداعى جىلدىڭ 7 قاراشا كۇنى مەملەكەت باسشىسى ءبىلىم ورداسىنىڭ باسقارما ءتوراعاسى – رەكتورى جانسەيىت تۇيمەبايەۆتى قابىلداپ، ۋنيۆەرسيتەت قالاشىعىن جاڭعىرتۋ بويىنشا ءبىرقاتار ناقتى تاپسىرمالار بەردى.
«مەملەكەت باسشىسى ءبىلىم-عىلىم سالاسىنا ەرەكشە كوڭىل بولۋدە. ونىڭ ءبىر دالەلى قازۇۋ قالاشىعى قۇرىلىسىنىڭ ەكىنشى كەزەڭى تىكەلەي پرەزيدەنت تاپسىرماسىمەن جۇزەگە اسىرىلادى. قازۇۋ-دىڭ ءىى دامۋ جوسپارى بويىنشا قالاشىقتا جالپى 12 جاتاقحانا، 8 وقۋ كورپۋسى بوي كوتەرەدى. بۇل دەگەنىمىز ۋنيۆەرسيتەتتەگى وقىتۋشى قۇرام مەن ستۋدەنتتەرگە جاقسى جاعداي جاسالۋىنا مۇمكىن بەرەدى. تاۋەلسىزدىك كۇنى قارساڭىندا بۇل ۋنيۆەرسيتەتىمىز ءۇشىن ۇلكەن وقيعا. قۇرىلىس كومپانياسى جەدەل ءارى قارقىندى تۇردە جۇمىس جاسايمىز دەپ ۋادە بەرىپ وتىر. كەلەسى جىلدىڭ قاراشا ايىندا جاتاقحانا قولدانىلۋعا بەرىلەدى دەپ كۇتەمىز»، - دەدى ءبىلىم ورداسىنىڭ باسقارما ءتوراعاسى – رەكتورى جانسەيىت تۇيمەبايەۆ.
جاڭا جىل قارساڭىندا 4 وقۋ كورپۋسى، قاڭتار ايىندا 35 000 شارشى مەتر ەمحانا قۇرىلىسى باستالماق. مەديسينالىق ورتالىقتا پوليكلينيكا، مەديسينا جانە دەنساۋلىق ساقتاۋ فاكۋلتەتى، ستوماتولوگيا جۇمىس ىستەيدى. بۇعان قوسا، قىزمەتكەرلەرگە ارنالعان تۇرعىنجاي، يننوۆاسيالىق ورتالىق، IT حاب، سپورتتىق-ساۋىقتىرۋ ورتالىعى ت.ب عيماراتتار سالىنادى دەپ جوسپارلانىپ وتىر.
«از ۋاقىتتىڭ ىشىندە وسى ۋنيۆەرسيتەتتىڭ باسشىلىعى تاپسىرىس بەردى. ءتورت ايدىڭ ىشىندە قۇرىلىستىڭ سمەتالىق-جوبالارىن جاسادىق. جاتاقحانانىڭ بولمەلەرى كەڭ، ساۋلەلى، جىلى بولادى. جوبا بەكىتىلگەننەن كەيىن قۇرىلىس جۇمىستارىن باستادىق. ءبىر اي بولدى باستاعانىمىزعا. جوبا بويىنشا ون بەس ايلىق مەرزىمى بار. توعىز قاباتتى، جەرتولەسى بار. ونىنشى قاباتتا تەحنيكالىق جاعى قاراستىرىلعان. قۇرىلىس جوباسىن بويىنشا جاڭا قۇرىلىس ماتەريالدارى، زاماناۋي ديزاينەرلىك ۇلگىدە بەكىتتى. كەلىسى جىلى جەلتوقسان ايىندا قۇرىلىستى تولىعىمەن اياقتاۋ نيەتىمىز بار»، -دەيدى "Kenzhe Holding" ج ش س ديرەكتورى ءابدىعاپپار سارسەنبايەۆ
قازۇۋ قالاشىعىنىڭ ءىى دامۋ جوسپارى الداعى ۋاقىتتا كەزەڭ-كەزەڭىمەن جۇزەگە اسىرىلماق. بۇل قۇرىلىس جۇمىستارى الداعى 3 جىلعا جوسپارلانىپ وتىر. الداعى كۇزدە قازۇۋ 90 جىلدىعىن سالتاناتتى تۇردە اتالىپ وتەتىنىن جەتكىزگەن جانسەيىت قانسەيىت ۇلى جاتاقحانا قۇرىلىسىنىڭ باستالعانىن رەسمي جاريالادى.
ايتا كەتەيىك قازىرگى تاڭدا ءال-فارابي اتىنداعى قازۇۋ-دا 15 جاتاقحانا بار. وندا وقۋ ورداسىنىڭ 6 مىڭعا جۋىق ستۋدەنتى ورنالاستىرىلعان. 2026 جىلعا دەيىن 30 مىڭ ستۋدەنتتى جاتاقحانامەن قامتاماسىز ەتۋدى كوزدەپ وتىر.
