جاسىل جەلەك كوبەيىپ، بازارلار جاڭعىرتىلادى

الماتىنىڭ جاڭا ەتج جاسىل جەلەكتەر الاڭىن 2030 جىلعا دەيىن 3 ەسە كوبەيتۋدى كوزدەيدى

الماتى اكىمدىگى ساراپشىلارمەن جانە قوعام وكىلدەرىمەن تالقىلاۋدان كەيىن قالانىڭ 2040 جىلعا دەيىنگى باس جوسپارىنا سايكەس ازىرلەنگەن ەگجەي-تەگجەيلى جوسپارلاۋدىڭ جاڭا جوبالارىن (ەتج) بەكىتتى.

قالالىق جوسپارلاۋ جانە ۋربانيستيكا باسقارماسى اتاپ وتكەندەي، جاڭا ەتج-دا ساياباقتار، سكۆەرلەر، بۋلۆارلاردى قوسقاندا، جالپى پايدالانىمداعى جاسىل جەلەكتەر الاڭىن 2030 جىلعا دەيىن 3 ەسە كوبەيتۋ كوزدەلگەن. 

سونىمەن قاتار، ساۋدا كەڭىستىگىن جاڭارتۋ اياسىندا بازارلاردىڭ اۋماقتارىن كوگالداندىرۋ جوسپارلانعان. مىسالى، المالى اۋدانىنداعى روزىباكييەۆ كوشەسىنىڭ بويىنداعى «تاستاق» جانە «وپتوۆكا» بازارلارى جاڭعىرتىلادى. جەتىسۋ اۋدانىندا سولتۇستىك اينالما جول بويىنداعى بازارلاردى جاڭعىرتۋ، سونىمەن بىرگە، سۋ قورعاۋ بەلدەۋلەرىن اباتتاندىرۋ جانە تازارتۋ كوزدەلگەن. بۇل شارالار ساۋدا الاڭدارىنىڭ ساپاسىن ەداۋىر ارتتىرادى جانە كەلۋشىلەر مەن كاسىپكەرلەرگە قولايلى جاعداي جاسايدى.

بۇعان قوسا، جۇردەك كولىك قاڭقاسى مەن كوشەلەر جەلىسىن ەنگىزۋ ەسەبىنەن قالانىڭ بارلىق اۋدانى بىر-بىرىنە بىرىكتىرىلەدى. قالا تۇرعىندارى قالانىڭ كەز كەلگەن جەرىنە وڭاي بارا الادى. مۇنداي قوزعالىستىڭ دالىزدەرى بيزنەس ءۇشىن، ونىڭ ىشىندە ساۋدا سالاسىندا تارتىمدى بولادى.

جالپى، ەتج تۇراقتى جانە فۋنكسيونالدى قالالىق كەڭىستىك قۇرۋعا باعىتتالعان. ولار قالا قۇرىلىسىن ايماقتارعا ءبولۋدىڭ، قىزىل سىزىقتاردىڭ، حالىققا الەۋمەتتىك، مادەني جانە كوممۋنالدىق قىزمەت كورسەتۋ نىساندارىن ورنالاستىرۋ ءۇشىن اۋماقتاردى رەزەرۆتەۋدىڭ، كوشە-جول جەلىسىن ۇيىمداستىرۋدىڭ، ينجەنەرلىك كوممۋنيكاسيالاردى جۇرگىزۋدىڭ، اۋماقتاردى اباتتاندىرۋ مەن كوگالداندىرۋدىڭ نەگىزگى باعىتتارىن بەلگىلەيدى.