الماتىدا جاڭا ەتج: قالادا ۇزىندىعى 200 شاقىرىم جاسىل دالىزدەر مەن ۆەلوجولدار قۇرىلادى
الماتى اكىمدىگى قالانىڭ 2040 جىلعا دەيىنگى باس جوسپارىنا سايكەس ازىرلەنگەن ەگجەي-تەگجەيلى جوسپارلاۋدىڭ جاڭا جوبالارىن قابىلدادى.
ەتج ازىرلەۋشىلەرى باسشىلىققا العان قاعيدانىڭ ءبىرى – قالا كوشەلەرىندە جۇرۋشىلەردىڭ ءار توبى ءۇشىن جەكە ينفراقۇرىلىم، اتاپ ايتقاندا تروتۋارلار، ۆەلوجولدار، اۆتوكولىك جولدارى، قوعامدىق كولىككە ارنالعان جولاقتار قۇرىلۋعا ءتيىس.
ماسەلەن، تاريحي ورتالىقتا ەتج بويىنشا جاياۋ جۇرگىنشىلەر ءۇشىن قالپىنا كەلتىرىلەدى، ال قالعان اۋدانداردا جاياۋ جۇرگىنشىلەر بايلانىسى جۇيەسى جولعا قويىلادى - 2030 جىلعا قاراي الماتىدا قوسىمشا 200 شاقىرىم جاياۋ جۇرگىنشىلەر ايماقتارى مەن ۆەلوجولدار قۇرىلادى.
جالپى، ەتج مەدەۋ شاتقالى، باۋم توعايى، سايران كولى، بورالداي توعاندارى، ىلە-الاتاۋ تابيعي پاركىنىڭ اۋماعى جانە ت.ب. تابيعي كەشەندەر اراسىندا جاسىل دالىزدەر قۇرۋ كوزدەلگەن.
بۇل ءۇشىن ۇلكەن جانە كىشى الماتى، ەسەنتاي جاعالاۋلارىن اباتتاندىرۋ جانە كوگالداندىرۋ اياقتالىپ، ۇاك بويىندا دەمالىس ايماعى جانە باسقا دا جاسىل دالىزدەر قۇرىلادى. ورمان-ساياباق ايماعى كوكقاينار كەنتىنىڭ شىعىسىندا، شاڭىراق 1 جانە 2 شاعىن اۋداندارى اراسىنداعى سايدا، «باتىس» پوليورتالىعىندا – جاڭا جەلىلىك ساياباقتا پايدا بولۋعا ءتيىس. قۇلجا كۇرە جولى مەن بۇقتىرما كوشەسىنىڭ قيىلىسى اۋدانىندا (اۋەجايعا بارار جولدا) كولەمى 120 گا كول مەن ەكى وزەنى بار تابيعي اۋماقتى اباتتاندىرۋ جالعاسادى.
بۇعان قوسا، الماتىنىڭ كەشەندى كولىك سحەماسىن (ككس) ازىرلەۋ اياسىندا ۆەلوسيپەد كولىگى ينفراقۇرىلىمىن دامىتۋدىڭ ناقتى باعدارلاماسى قالىپتاستىرىلىپ جاتىر. ۆەلوينفراقۇرىلىمدى كەڭەيتۋ بويىنشا جوبالار بيىل جۇزەگە اسىرىلا باستايدى. 2024 جىلى شامامەن 20 شاقىرىم كوشە ءۇشىن جوبالاردى ازىرلەۋ جانە ىسكە اسىرۋ جوسپارلانعان.
ۆەلوجولاقتاردىڭ ۇزاقتىعى جانە جوبالاردى ىسكە اسىرۋ مەرزىمدەرى جوبالاۋ-سمەتالىق قۇجاتتامانى (جسق) ازىرلەگەننەن جانە ناقتى جوباعا ساراپتامانىڭ وڭ قورىتىندىسىن العاننان كەيىن ايقىندالادى.
ەستەرىڭىزگە سالا كەتەيىك، باس جوسپاردا مەگاپوليستى دامىتۋدىڭ مونوسەنتريستىك مودەلىنەن پوليسەنتريستىك مودەلگە كوشۋ قاعيداتى بار. وسىلايشا، 2030 جىلعا دەيىن 5 پوليورتالىق قۇرىلادى، بۇل «شىعىس قاقپاسى»، «تاريحي ورتالىق»، «سولتۇستىك»، «وڭتۇستىك-باتىس»، «باتىس» سىندى ارنايى ايماقتار، قوعامدىق جانە ىسكەرلىك بەلسەندىلىك ورتالىقتارى.